Evento

Ta un tradicion Arubano cu tur aña ta celebra fiesta di San Juan riba 24 di juni. Historia ta indica cu e fiesta di San Juan
a origina na e parti sur di Mexico despues pasa pa Guatemala y otro paisnan Centro Americano, yega te Venezuela pa
despues ser treci Aruba unda el a keda un tradicion te dia di awe.
Na Aruba ta celebra e fiesta di San Juan na un manera unico. Na Guatemala semper nan a sigui celebra fiesta di San Juan,
pero na un otro estilo. Principalmente e Indjannan ta celebra e fiesta aki cu baile y musica folclor. Na Venezuela nan ta
celebra San Juan de Barburato, pero tampoco ta manera esun di Aruba.
E fiesta di San Juan na paisnan Latino tin hopi di haci cu supersticion. Antes e Indjannan tabata kere den varios Dios y spirito.
Ta bon conoci cu e Indjannan tabatin temor pa esakinan. Ta pesei nan tabata contenta nan cu ofrenda y fiesta.
Un di e fiestanan aki tabata e fiesta di agricultura na ocasion di cosecha.
E misioneronan a combina fiesta di San Juan cu e fiesta di cosecha di e Indjannan.

Nos bieunan ta conta cu aki na Aruba, den pasado, e cunukeronan tabata warda tur e tronconnan di nan cosecha anterior,
manera palo di maishi, rama y otro tipo di palo, pa kimanan riba dia di San Juan. E tradicion di antes tabata cu nan tabata
cuminsa cende candelanan grandi bispo di San Juan, esta dia 23 di juni. E kimamento mes tabata simbolisa purificacion, core cu
tur mala suerte y pa por tin un miho cosecha. Na fiesta di San Juan mes tabata tin cierto weganan manera bulamento di candela,
bailamento, cantamento, contamento di storia, leyenda y chasco, tur esaki tabata sosode rond di e candela.
Hopi cunukero tabata cende candela, tanto bispo di San Juan, como dia di San Juan mes.
Fiesta di San Juan tabata algo grandi na Aruba. Mayoria di e pueblo no tabata traha riba dia di fiesta di San Juan. Parti di atardi,
ora cu ta cuminsa bira un poco skur, e fiesta ta cuminsa. E tradicion di dera un gai bibo ta algo comun den e epoca di antaño.
Awendia dera un gai bibo no ta permiti mas.

Den tur bario tabata tin e fiesta aki. Hombernan tabata baila cu lenso mara dilanti nan wowonan y ta purba di dal e gai.
Prome cu e cuminsa baila y busca manera di dal e gai, un persona ta drai e algun biaha rond, te ora e perde tur sentido di direccion.
Despues e ta haya un palo di bati maishi den su man, cu cual e mester mata e gai. Bailadonan di experencia tabata sigui e biento pa
nan sa unda mas o menos nan ta para. Tambe e bailadonan ta schuif nan pia abou na suela buscando e gai, pasobra no mag di fula
e tera cu e palo. E custumber ta cu cada bailado por purba tres biaha pa dal e gai. Si tres biaha bo faya, anto ta bin un otro bailado
bin purba.
Riba e dia aki e mucha muhernan ta bisti un strik geel den nan cabei y nan saya ta largo y color geel.
E musiconan tambe tabata bisti un banchi geel of cora. E grupo musical tabata consisti di un of mas fio, tambor of tambu, wicharo
of wiri y di un pregonero of cantante. Un cachete di burico tabata ser usa algun caminda na lugar di maraca. Un cantante tabata pregona
y tur presente tabata canta e refran. Segun e bailado of matado di gai ta purba di dal e gai cu ta dera den tera (awor nan ta usa un calbas seco),
e musica ta resona keto bai y cada bez cu e hera e gai ta hopi harimento y diberticion tin. Pues e publico presente semper tabatin ratonan sumamente
dibertido. Cada biaha cu e palo toca tera un oportunidad ta bai perdi. Tres oportunidad pa dal e gai ta relaciona cu e gai cu a canta tres biaha segun
biblia ora cu San Pedro (y no San Juan) a gaña cu e no conoce Hesus. Na Santa Cruz un par di cien aña pasa un cambio basico a tuma luga.
Aki e no a usa un gai bibo pero a usa bandera di diferente colo; cora, blanco, blou, berde y un bandera geel cu rand cora.
E bandera aki ta bandera di San Juan. Ta tapa wowo di tur e participantenan y despues ta pone e banderanan riba un mesa segun
cantidad di e participantenan. Bailando e participantenan mester purba di gara e bandera di San Juan despues di un señal.
Esun cu coi e bandera di San Juan ta bira e ganado. E bentaha di e forma aki ta cu por haci e wega aki paden sin mester preocupa
pa scuridad of si awa yobe.