Evento

Gilberto François Croes, cariñosamente yama Betico, a nace na Aruba dia 25 di januari 1938 y a fayece dia 26 di november 1986. E tabata casa cu señora Glenda Croes y e tabata tata di 4 yiu.

Despues di su carera escolar Betico a sigui su estudio na Hulanda na unda el a logra su diploma di maestro di scol. Durante su estadia na Hulanda e tabata masha activo mes den diferente organisacion Antiyano. Ora cu Betico a regresa Aruba el a bai traha como maestro na Colegio San Hose na Santa Cruz y despues di a logra su diploma “LO Spaans y Handelskennis” el a bai traha na Colegio San Antonio.
Na Aruba tambe, mescos cu na Hulanda, e tabata masha activo riba tereno deportivo, musical, cultural y social. Na aña 1967 el a drenta arena politico como un candidato riba lista di AVP y e mes un aña a eligie como miembro di Conseho Insular di Aruba. El a fungi como diputado di educacion. Despues cu a surgi un diferencia di opinion fundamental den AVP, Betico a funda, dia 9 di februari 1971, su mes un partido politico Movimento Electoral di Pueblo (MEP), di cual e tabata e lider. Betico den su carera politico nunca a acepta ningun puesto politico sino solamente a fungi como Consehero General di Gobierno. Desde e tempo ei Betico a hiba un lucha feros pa Aruba logra su Status Aparte. Na mei 1985 Parlamento Hulandes a acorda pa haci cambio den Statuut p’sina Aruba drenta su Status Aparte dia prome di januari 1986. Esaki Hulanda a mara na condicionnan bastante stricto. Esun mas stricto tabata cu Aruba por haya su Status Aparte na 1986 pero mara na un independencia den 10 aña. Betico a acepta e reto aki y tabata di opinion cu despues por haci cambio den esaki.
Desafortunadamente Betico no a haya e oportunidad pa gosa di e Status Aparte di Aruba, despues cu el a haci tanto esfuerso, lucha y sacrificio pa logra esaki.
Dia 31 di december 1985, pa 9’or di anochi, solamente algun ora prome cu Aruba a bira un pais autonomo den Reino, el a sufri un accidente di trafico cu a lag’e gravemente herida. Despues di a keda 11 luna den coma Betico a fayece na Hulanda riba 26 di november 1986.
E pueblo Arubano nunca por lubida e palabranan historico di e gran homber aki: “Si mi cai na caminda, gara e bandera y sigui cu e lucha.”