Evento

E pueblo di Aruba, apesar di su anhelo pa dicidi su propio destino pa mas di mitar siglo, nunca antes a propone un bandera. Si e isla tabata conoce un escudo oficial y un himno cu e pueblo a bin acepta como di dje.
Riba indicacion di Gobierno Insular di Aruba a nombra un comision riba 21 di januari 1976, consistiendo di srs. Julio Maduro, Hefe di departamento di asunto laboral; Wouter van Romondt, profesor di dibuho na Colegio Arubano; Ronald Donk y Juan E. Wever, como secretario, a cuminsa cu su tarea di organisa un concurso den pueblo pa un diseño di bandera. A manda un total di 693 diseño aden.
Durante e tarea di e comision diferente hecho pertinente a resulta. Asina hopi contribuyente, mayoria mucha di scol, a desea di mira un strea di 4 punta y esaki pa diferente motibo. Tambe un cantidad grandi a opta pa lista o marca di color horizontal y/o vertical.
E colonan dominante tabata cora, blanco, blauw y geel. No a scohe e bandera mes entre e contribucion di e concurso pa determina e bandera. E comision a dicidi, cu yudansa di un experto Americano di “Flag Research Institute” na Boston, pa entrega nan propio diseño, cu ta contene un combinacion di e color, nificacion y balor, cu e contribuyente kier a dune.
Ariba 16 di maart 1976, nos parlamento a acepta e diseño aki, cual awe ta e bandera oficial di Aruba.
Dos dia despues, riba 18 di maart, a hisa e bandera aki pa prome biaha, den un grandioso inauguracion oficial di himno y bandera, den Wilhelmina Stadion.

Nificacion
E color blauw di e bandera ta denota e lama inmenso cu ta rondona un isla, e strea di 4 punta, cu ta retene e posicion di honor mas cerca e asta y e parti ariba di e bandera, pa simbolisa e posicion di Aruba den e oceano, cu ta rondone.
E bandera tambe ta denota cu e isla ta anhela di ta soberano, esta independiente di otronan, pero cu no kier aisla su mes di esnan cu ta rondone y ta trata di keda liga cu nan pa e lama. Ta simbolisa esaki claramente pa e dos strepinan horizontal den e bandera, cu ta denota e posicion liber y aparte di Aruba den e mes lama, sin distancia su mes di otro isla o pais.
E strea di cuatro punta ta simbolisa e cuatro direccion di compas, for di cual direccion representante di 40 y mas pais a bin Aruba y a forma un comunidad, cu ta biba harmoniosamente, cu ta garantisa libertad maximo. Tambe e ta mustra riba e cuatro costanan di e isla unda lama ta forma un barera natural.

E strea su cuatro puntonan ta refleha e 4 caminda maritimo y aereo, for di unda nos economia ta sali y for di unda ta bin y ta regresa nos turismo y e demas pilarnan di economia, manera comercio y industria.
E strea cora cu colo blanco ta simbolisa e cariño inmenso di cada ciudadano pa su isla; ta refleha aademas e colo di nos industria di antaño di palo di brazil y cocenilla y ta rindi homenahe na e sanger Indjan, drama den Rooi Frances, pa su libertad.
E strea blanco ta simbolisa e santo sin mancha di e playanan extenso, cu ta rondona e isla y na mes un momente e puresa di cursaon di e habitantenan, cu ta respeta husticia, orden y libertad.
Geel ta e colo di abundancia. E ta e colo apropia pa denota nos industria kimico y petrolero y di e semper aloe bibo; cu nos comercio y turismo ta forma conhuntamente e fuente di ingreso di nos pueblo.
E strepinan colo geel ta denota e fuente di ingreso di antaño, manera e industria di oro di guano y di aloe.
E ta simbolisa tambe nos industria di butishi y di artesania Indjan di siglonan pasa y culturalmente e industria di sombre. Ademas un cantidad grandi di nos palo y mata ta florece den e colo geel, manera kibrahacha, brasil, bonchi di strena, curahao, tuturuto, aloe y wanglo.