Evento

Nos Escudo
E escudo di teritorio insular di Aruba, ta den uso oficial desde 15 di november 1955, fecha riba cual Parlamento di Aruba, a aproba e escudo den un resolucion insular. Originalmente “Atelier voor Heraldische Kunsten”, estableci na Amsterdam, Hulanda, a crea e diseño basico di e escudo. Den un concurso pa escudo organisa pa Gobierno Insular di Aruba y anuncia den corant riba 27 di maart 1953, e tayer Hulandes di arte. a somete e diseño, cual Gobierno Insular a selecta entre varios otro diseño. Riba e diseño aki, sin embargo, Gobierno di Aruba a haci dos cambio cu aprobacion di “Atelier voor Heraldische Kunsten” pa hacie refleha mas ainda e simbolonan inconfundibel di Aruba.
E cambionan aki ta den e di prome y di dos cuartel di e escudo. Miemtras cu e tayer Hulandes a pinta e solo den e prome cuartel, Gobierno Insular a cambi’e pa un mata di aloe. Den e di dos cuartel originalmente e tayer Hulandes a pinta e cero di Jamanota; Gobierno di Aruba a cambia esaki pa e cero di Hooiberg. Bou di e reglanan di e concurso, e diseño di e escudo a bira propiedad di teritorio insular di Aruba. Asina ta cu escudo aki ta esun oficial di Aruba su Gobierno, manera aproba dor di nos parlamento riba 15 di november 1955.
Un escudo di un pueblo ta un simbolo cu ta refleha diferente aspecto tipico di e pueblo. Nos bunita escudo tambe tin su nificacionnan cual ta manera ta sigui.

Den e prome cuartel e mata di aloe ta simbolo di e prome fuente di bienestar di nos teritorio insular.

Den di dos cuartel, e sero di Hooiberg, como parti di e entidad, ta simbolisa e isla di Aruba, cu ta surgi for di lama.
E colo berde duna, como colo di alegria, expresion di e alegria pa e autonomia obteni. E liñanan ondeante ta figuracion di nos lama.

Den e di tres cuartel, dunamento di man ta simbolisa e lasonan amistoso cu otro nacion y pueblo, tanto den sector politico como tambe economico cu Hulanda y otro isla di Antiya Hulandes. E colo cora ta simbolisa generosidad, modestia, balor y laboriosidad, riba cual e lasonan aki ta basa.

Den di cuater cuartel, e wiel ta representa e industria como fuente di bida di mas importante di nos isla.

E crus riba henter e escudo ta simbolisa devocion y fe.

E leon riba e escudo ta representa forsa y generosidad, cual calidad ta ser subraya pa medio di e colo.

E ramanan di laurel ta simbolo di pas y amistad.