Evento

ARUBA DUSHI TERA, ta e titulo di e composicion musical, cu a bira oficialmente e himno nacional di Aruba. Pa nos historia ta interesante, importante y hasta necesario pa duna un relato, maske ta cortico, di factornan responsabel pa e nacemento di Aruba Dushi Tera, su desaroyo gradual den nos comunidad como medio di expresion di patriotismo y finalmente su aceptacion como himno nacional di Aruba.

E historia di e himno di Aruba ta haya su inicio den e actividad y aspiracion den e dos cuidadanonan responsabel pa creacion di nos himno.
A sosode cu na aña 1951, srs. Rufo Wever y Padu Lampe, dos musico bon conoci riba nos isla, a sinti e necesidad pa cuminsa conserva y promove loke nan ta considera di ta e ritmo y melodia tipico di Aruba. Inspira pa e idea aki, conhuntamente, nan a cuminsa cu grabacion y produccion di disco di 78rpm, cual nan a lansa riba mercado di Antiya Hulandes. E musica cu tabata produci tabata composicionnan original di Rufo Wever y Padu Lampe mes. Algun numero cu nan a compone conhuntamente, ta piesanan di algun compositornan bieu di Aruba y tambe e musica cu ta pertenece na e folclor di Aruba. Di e forma aki nan a haci un contribucion sumamente balioso pa conservacion y propagacion di nos ritmonan tan gusta, manera wals y tumba, cu awe ta sigui resona cu alegria den oido di nos pueblo.

Manera custumber, un dia mainta na aña 1952 (e fecha exacto no ta conoci) Padu a yega cerca Rufo, pero e biaha aki cu iniciativa pa conhuntamente nan compone un piesa cual lo mester expresa e amor di nos pueblo pa Aruba y desperta su sintimento partriotico pa su isla natal. Claramente a surgi e pregunta si ta traha e piesa den ritmo di marcha of na wals. E solucion tabata facil ya cu por crea e figura di e piesa den un forma cu por toke tanto den ritmo di wals y como den ritmo di marcha. E mes un dia ei e piesa a keda cla y Aruba Dushi Tera a nace.
Danki na e organisacion activo “De Trupialen” , e tempo ei bou direccion di e dinamico Frere Alexius, cu a hinc’e den nan reportorio, su popularidad a crece. Poco poco y espontaneamente otro instancia priva y oficial a cuminsa usaAruba Dushi Tera, na tur ocasion di importancia pa nos isla. Na aña 1954 dos di e radio emisoranan e yega di transmiti Aruba Dushi Tera den ritmo di marcha. E compositornan a haya e impresion cu den ritmo di wals e piesa a cai mas na smak di hopi hende. Na 1976 , Gobierno Insular di Aruba, a instala un comision di seis ciudadano prominente y a-politico di nos comunidad, cu e tarea di conseha Gobierno riba e pregunta, si por haci Aruba Dushi Tera e himno nacional y den cua ritmo.
E comision aki tabata consisti di sra. M. Arends-Croes, sres. R. Odor, J.C. (Padu) Lampe, E. Bennet, H. Booi y J. Wever. Unanimamente e comision den su totalidad a vota pro pa recomenda Aruba Dushi Tera, como himno nacional y den ritmo di wals. E proposicion a bin dilanti tambe pa añadi un couplet mas. Señor Hubert (Lio) Booi a contribui na e himno cu su inspiracion dor di anadi na e ultimo couplet, cu ta elogia e gran cordialidad di e pueblo di Aruba, e frase ... cu Dios por guia y conserva su amor pa libertad. Tambe señor Booi a bin pa cu e idea pa haci e cuminsamento di e cantica un tiki mas largo pa asina e hendenan tin e tempo pa lanta para y duna honor na e himno.

Dia 16 di maart 1976, Gobierno Insular di Aruba, a aproba Aruba Dushi Tera, como himno oficial di Aruba. Y riba e anochi di 18 maart 1976, pa e acto oficial organisa pa Gobierno Insular di Aruba, den Wilhelmina Stadion pa proclamacion oficial di nos himno y bandera y den presencia di un multitud di ciudadano presente, ARUBA DUSHI TERA, pa di prome biaha a resona oficialmente como himno oficial di Aruba. Conmovedoramente un coro hubenil bou direccion di sra. Maybeline Arends-Croes, acompaña pa e orkesta sinfonico dirigi pa sr. Joy Kock a interpreta e himno. Pa semper e anochi aki lo keda registra den historia di Aruba.