Cas di Cultura

Dia 24 juni 1957 sra.J.H.M. Kwartsz a pone e prome piedra pa Cas di Cultura.
E aña siguiente, dia 15 di november, e inauguracion oficial di e edificio a tuma lugar. E tempo ei Cas di Cultura tawata ser yama Cultureel Centrum Aruba.
E edificio moderno aki ta un diseño di sr. F.F. Zingel, un arkitecto di Corsou.

E auditorio tin 535 asiento fiho. Por agrega 37 asiento extra na un total di 572 asiento, dor di haci e escenario mas chikito. E escenario ta midi 9.5x9.5 metro. E baki di orkesta ta basta grandi y su vloer por ser poni na mes un nivel cu e vloer di e escenario, haciendo asina e espacio riba e escenario mucho mas grandi ainda. Esaki ta facilita un orkesta durante un concierto of ora un produccion ta rekeri esaki. E acustica di e teatro ta ser considera hopi bon. E ekiponan di sonido y lus, hopi moderno, sofistica y completamente computerisa, ta nos orguyo.

Den e edificio tin e oficina di UNOCA y tambe e salanan di balet. Scol di baile Diana Antonette ta duna les di baile clasico, moderno y folclorico. Na Cas di Cultura ta ubica tambe e scol di musica "Rufo Wever".
E profesionalnan di e scol aki ta siña e studiantenan toca diferente instrumento, canto y formacion general di musica. E localnan y oficina ta keda na e prome piso. Nos tin tambe un sala di exposicion, caminda artistanan local y internacional por expone nan obra. Por usa e sala aki tambe pa tene lectura, tayer, seminario, etc.

E logo di Cas di Cultura a ser diseña pa un artista Arubano, sr. Evelino Fingal.
E fundacion " Stichting Schouwburg Aruba" ta un organisacion priva, cu ta maneha e edicicio cu yudansa financiero di Gobierno. Cas si Cultura su mision ta pe promove arte y cultura.

Adres: Vondellaan # 2

Tel: (297)5821010

Fax: (297)5882803

e-mail: cascultura@setarnet.aw