Historia

INSTITUTO DI CULTURA ARUBA

Introduccion
Dia 30 di september 2003 ta haci 25 aña cu Instituto di Cultura Aruba (ICA) a keda oficialmente institui. Cu introduccion di un website ICA ta desea di brinda e comunidad e servicio di percura pa nan haya informacion riba diferente tereno cultural y tambe di usa e web-site di ICA pa nan pone nan informacion cultural.

Historia di ICA
Na aña 1963 Minister di Cultura y Educacion di Gobierno Central di Antiya Hulandes, sr. I. C. Debrot, a institui un departamento cu lo pone atencion riba tur asunto cu ta relaciona cu Cultura na Aruba. Pa e departamento funciona optimalmente, tabata necesario pa nombra un hefe. E persona aki mester ta un persona completamente integra den e comunidad Arubano y alabes e mester ta na altura di e bida cultural riba e isla. Segun Minister Debrot, e persona adecua pa e puesto di Hefe di e Departamento pa Cultura y Educacion na Aruba tabata señor Hubert (Lio) Booi. Sr. Booi a fungi como Hefe di e Departamento di Cultura y Educacion di aña 1963 te na cuminsamento di aña 1978. E departamento aki tabata situa na e di tres piso di Oficina di Post.
Na cuminsamento di aña 1978, Gobierno Insular di Aruba tabatin e pensamento pa prepara e pueblo culturalmente den preparacion pa Aruba su Status Aparte. A acerca sr. Booi pa cuminsa traha riba e vision aki y e proposicion di sr. Booi tabata pa duna e departamento un nomber na Papiamento. E nomber cu sr. Booi a bin cune tabata Instituto di Cultura Aruba y dia 30 di september 1978,

ICA a keda oficialmente institui. Na 1979 sr. Booi mester a baha cu penshon pero el a keda fungi como Hefe di ICA te 1 di juli 1980.
Na 1980 sr. August (Juchi) Croes a keda encarga cu e departamento como Hefe interino y dia 1 di maart 1982 sr. Leo Tromp a keda nombra como e di dos Hefe di ICA te fin di aña 1995 ora el a baha cu penshon. Señor Evelino Fingal, como Hefe interino, a keda encarga cu e maneho di ICA te na aña 1998 despues cu Gobierno di e tempo ei, a forma un Team di Maneho pa traha riba reorganisacion di ICA. E team aki a keda desolvi na januari 2001, ora cu sr. Frank Croes a keda nombra como Hefe di ICA. Dia 15 di januari 2001 sr. Frank Croes a asumi su posicion como e di tres Hefe di ICA. E Hefe nobo a mantene e mes un structura di e seccionnan ya existente desde 1996. Esta e seccion di arte dramatico, seccion di escultura/arte plastico, Museo Aqueologico Aruba, e seccion administrativo y e seccion di yudansa tecnico pa actividad cultural. E falta di diferente seccion manera, por ehempel, un seccion di investigacion y un seccion pa literatura y idioma, ta stroba ICA di funciona optimalmente y pa ta mas activo riba mas area cultural.

Meta
E meta cu Gobierno Insular di Aruba na aña 1978 a institui Instituto di Cultura Aruba tabata pa prepara e pueblo di Aruba culturalmente como anticipacion di su Status Aparte. Despues di Status Aparte di Aruba na 1986 e meta di ICA a cambia y a bira conservacion, mantencion y promocion di nos cultura den un forma mas amplio. Tambe ICA mester a percura pa difusion di nos cultura.

E desaroyo multicultural nobo ta exigi pa ICA, den un termino cortico, bin cu un plan di accion pa primeramente analisa e situacion y pa despues bin cu un plan structural pa un termino largo. Di e forma aki e Instituto por propaga e cultura di Aruba como un identidad nacional. Tambe ICA mester sigui desaroya, consolida y stimula e consenshi socio-cultural di e comunidad Arubano.
E mester haci esaki dor di:

conserva e herencia cultural Arubano;
fomenta un participacion maximo di tur esnan envolvi den desaroyo y implementacion di e maneho cultural;
promove e cultura propio y stimula e participacion di e comunidad multicultural den diferente expresion;
stimula desaroyo di forma nobo di expresion cultural propio y sostene diferente organisacion;
motiva e integracion di imigrante den e cultura Arubano;
percura pa tin un balance efectivo entre e formanan cultural;
proyecta cultura Arubano den exterior dor di busca y mantene contacto nacional y internacional pa intercambia informacion, expresion y otro manifestacion cultural;
contribui na desaroya un infrastructura pa e sector cultural na beneficio di e comunidad Arubano y pa sostene e sector turistico.

Edificio
Na principio di aña 1978 ICA tabata ubica den un parti di e edificio caminda San Pedro Hospital tabata situa. Na aña 1979, Gobierno Insular di Aruba a cumpra e edificio Maria Convent situa na J.E. Irausquinplein 2-A, for di St. Catharina Stichting y ICA a muda den e edificio aki.

Durante e periodo di 1990-1991 a cuminsa planea detaye pa restauracion di e edificio aki.ICA a muda temporalmente den Layex Building na Wilhelminastraat nr. 9. E restauracion a dura te na final di 1995 y te awe ainda ICA ta situa den e edificio banda di misa na Playa.Logo
E logo cu ta simbolisa un era nobo ta un diseño di señor Frank Croes, Hefe actual di ICA. E logo ta inspira riba e arte indigena Arubano, haya den e cueba di Fontein. E colornan ta representa e diferente rasa cu ta forma parti di nos comunidad. E blokinan ta e diferente componente di nos cultura cu a keda forma dor di interaccion di diferente cultura. E interaccion aki a resulta den un sociedad multicultural y e unidad aki ta refleha den un armonia unico na mundo. E circulonan ta representa nos norma, balor, custumber y expresion tipico, cu ta forma e base di nos cultura. E rand color cora ta e calor humano Arubiano cu ta mantene e union di nos comunidad.
E hecho cu e colornan ta sali for di e rand ta indica cu cultura ta dinamico y den un desaroyo continuo.