Aruba 500 Aña?
Introduccion
Den e prome tres articulo Museo Arqueologico Aruba a trata 'E Origin Geologico di Aruba', 'E Prome Habitantenan di Aruba' (Periodo Preceramico: 2500 P.C.-1000 D.C.) y 'E Indiannan Caquetio di Aruba' (Periodo Ceramico: 1000-1515 D.C.). Como e aña aki nos ta conmemorando 'Aruba 500 aña', cual ta trata e encuentro entre dos cultura, nos lo pone enfasis riba algun topico pasobra ta existi hopi confusion tocante esaki. Ademas e periodo di prome contacto entre dos cultura totalmente diferente, di dos mundo totalmente diferente, a cambia e direccion di historia di nos isla na un manera asina drastico, cu e mester ser mira bao di un microscopio pa haya un idea con a inicia e proceso aki. E articulo aki ta e ultimo den un serie di cuatro cu nos a publica e aña aki.

E Prome Europeonan na Aruba
Hopi confusion ta existi tocante e aña y dia cu e Europeonan a pone pia riba of a mira nos isla pa prome biaha. Hopi autor a purba di reconstrui te un cierto nivel e prome biahe europeo banda di e islanan ABC, manera e.o. Kohl (1860), Menkman (1937, 1942), Van Meeteren (1937), Hartog (1953, 1961, 1968), Goslinga (1971, 1979), Ramos (1981), De Palm (ed.) (1985), Oliver (1989), Harley (1990), Haviser (1991) y Mansur (1991), pero ningun tin evidencia solido cual ta e aña exacto cu e prome Europeonan tabata na altura di existencia di Aruba (tur ta fuentenan secundario of terciario). Otronan a purba di adivina, asumi y hasta a trata di manipula hechonan pa haya un aña y dia, pasobra nos ta asina ansha pa tin e fecha exacto cu esaki a tuma lugar. Den ciencia y especialmente den historia, hechonan den forma di documentonan scirbi na e tempo cu cierto evento a tuma lugar (fuentenan primario) ta hopi importante pa sostene un teoria 100%. Den e caso aki e documentonan aki no ta existi, a ser perdi of no a ser haya ainda. E hecho ta cu, durante e expedicion famoso di Alonso de Ojeda banda di e costa di Venezuela, acompaña pa pilotonan famoso manera Amerigo Vespucci, Bartolomé Roldán y Juan de la Cosa, en frente di nortwest Venezuela, dos isla a ser bishita cu obviamente y generalmente ta ser acepta pa historiadornan di ta Boneiro y Corsow. Ta conoci cu e exploradornan di e Mundo Nobo tabata documenta cuidadosamente tur cos cu nan tabata haci, mira y encontra, aunque nan tabatin un imaginacion grandi ora di haci esaki. Esaki kier men cu si berdaderamente nan a bishita of a mira un di tres isla (Aruba!) nan lo a documenta esaki. E unico set di fuentenan primario cu nos tin di e expedicion aki, ta e documentonan di corte di un huicio cu ta relata e acusacionnan di fraude pa Bartolomé de las Casas y otronan, acusando Vespucci di ta trata di horta e credito for di Colón di (ta e prome Europeo cu) a "descubri" e Mundo Nobo. Un otro set di documentonan di e expedicion di De Ojeda na 1499 ta un serie di carta cu supuestamente Amerigo Vespucci a scirbi entre 1500 pa 1504 y un mapa di e Mundo Nobo compila pa Juan de la Cosa na 1500, usando su notanan di e biahe y esunnan di Vespucci. Lamentablemente e notanan original di De la Cosa a disparce algun tempo despues di su regreso pa Spaña, unda solamente e mapa a sobrebibi.

E mapamundi aki, pinta na of alrededor di 1500 pa De la Cosa y siendo e prome mapa di e Mundo Nobo incluyendo Caribe, obviamente ta mustra cu tin solamente dos isla en frente di costa nortwest di Venezuela y no tres manera tabata di spera si Aruba tabata conoci e tempo ey pa e Europeonan, manera hopi autor a sugeri. Tin autor cu ta kere cu por lo menos na 1501, e Europeonan tabata na altura di existencia di Aruba ya cu na Juni di e aña ey, prome cu De Ojeda a cuminsa cu su segundo biahe na 1502, el a ser nombra pa Fernando y Isabella como gobernador di Caquivacoa, Ququivacoa, Qunquevacoa, Chichivacoa, Coquibocoa y mas frequentemente yama Coquivacoa (Coro), na cual tambe e Islas Adyacentes a la Costa Firme tabata pertenece. Na e islanan aki supuestamente Aruba tambe tabata pertenece, pero no tin ningun documento cu ta bisa cu Aruba specificamente, tabata un di e islanan aki en frente di costa di Tierra Firme.
Ademas, e Mapa Cantino di Mundo portugues, cu a ser pinta na 1502 pa un cartografo anonimo y ta e di dos mapa di mundo incluyendo Caribe, tambe ta mustra solamente dos isla en frente di e costa nortwest di Venezuela. Sinembargo existencia di Aruba probablemente tabata conoci pa e Europeonan entre 1502 y 1505.

Errornan Historico den Historia di Aruba
Un punto interesante di discusion ta cu Boneiro y Corsow (indirectamente Aruba?) a ser yama Islas de los Gigantes. Supuestamente e Indiannan cu tabata biba riba e islanan aki temponan ey tabatin "estatura di gigante", pero proporcionalmente nan curpa tabata normal. Algun di e referencianan ta inclui mencionamento di "marcanan di pianan gigantesco" riba e isla di Corsow. E fantasianan aki a ser scirbi e.o. cu e intencion di bende buki, ya cu na principio di siglo 16 storianan di aventuranan na Mundo Nobo tabata "best-seller". Ademas den e periodo ey, ora Colón a encontra Mundo Nobo buscando un ruta mas cortico pa yega India, especialmente China, Japon y India tabata forma e centro di conceptonan medieval di rikesa infinito, ciudadnan cu casnan cu techonan di oro y islanan cu cantidadnan costoso sin limite di specerij, perla y seda. E mito Romano di e Epoca di Oro (of e Atlantis Griego) y e cuentonan di biblia di e Paraiso riba Mundo tabata conflui den e temponan ey den locual ta conoci como e leyenda di El Dorado. Criaturanan sobrenatural manera amazonanan, gigantenan y sernan medio-humano, medio-animal tabata parti di realidad y tabata influencia e percepcion di e eventonan cu e exploradornan tabata encontra na Mundo Nobo. E relatonan historico tabata desforma relaciona cu e perspectiva europeo, locual kier men cu nos mester ta cuateloso ora nos acepta e descripcionnan di e paisnan y nativonan cu e Europeonan tabata encontra aki como obhetivo of completamente exacto. Datonan arqueologico y historico ta mustra cu e estatura di e Caquetionan na e tempo di 'Contacto Europeo' tabata varia entre 1.55m y 1.65m, mientras cu intrusonan cu a bin despues, nunca a confirma e estatura supuestamente gigantesco di e Indiannan aki. Ta importante pa menciona cu e estatura averahe di e hombernan spaño e temponan ey tabata mas chiquito cu 1.55m, locual kier men cu e Indiannan por a parce 'personanan grandi' pa e Spañonan. Entre e hayazgonan arqueologico di e islanan ABC tin solamente un skelet cu tabatin un estatura relativamente halto compara cu e Spañonan, cual ta un skelet di Boneiro fecha na mas o menos 1220 D.C. y tabata midi entre 1.70m y 1.76m.
Un error historico cu hopi bez ta ser cometi, ta e uso di e palabra Caiquetio pa e Indiannan cu tabata biba e.o. na Aruba na e tempo di e 'Contacto Europeo' y algun tempo prome cu esey. E error ortografico comun di e nomber tribal como "Caiquetio" ta bin di solamente un fuente Spaño tempran, mientras cu mayoria di e documentacionnan tempran di e nomber tribal ta mas como "Caquetio". Na nos isla esaki tambe ta e consequencia cu autornan di siglo 20 semper a usa e nomber Caiquetio na lugar di Caquetio. E consequencia ta cu na Aruba hasta tin un club y un scol cu ta yama Caiquetio, pasobra nos pueblo a ser educa cu e nomber Caiquetio y no Caquetio locual ta haci'e dificil pa (mentalmente) cambia e nomber incorecto Caiquetio den Caquetio.
Un otro error comun cu hopi hende ta haci ta yama e Indiannan Caribense "Caribenan" y "Arowaknan". Esaki ta un error hopi grandi, ya cu diferente grupo etnico, racial y cultural hunto tabata parti di e grupo linguistico Arowak, incluyendo gruponan di habla Caribe, pero tur tabata diferente. E error aki tambe ta ser haci ora ta ser referi na e Caquetionan, como cu hopi biaha nan ta ser referi como "e Arowaknan". Corectamente ta cu e Indiannan Caquetio tabata papia un idioma Arowak yama Caquetio, cu actualmente ta un idioma extincto (no ta existi mas). Afortunadamente terminonan original Caquetio haya den toponimo, antroponimo y palabranan cu ta relaciona cu flora y fauna a sobrebibi na nos isla y den Papiamento, aunque di mayoria di nan, nos no sa e significacion como cu nan nunca a ser defini den cronicanan. E palabranan den vocabularionan di e diferente fuentenan di siglo 16 ta mustra cu Caquetio sin duda algun tabata un idioma Arowak, casi sigur Maipuran. E palabra kakïtho di e Lokono ta ser interpreta como 'hende' of 'sernan bibiente' (e nomber di e grupo linguistico Arowak ta deriba di e Arowak di e Lokono, un idioma Arowak papia na Guyana). E palabra Lokono kakitho ta obviamente relaciona cu e palabra Caquetio kaketio y ambos ta relaciona cu palabranan Pre-Andino pa 'persona'. Esaki kier men cu no e Arowaknan tabata biba na Aruba den e Periodo Ceramico y algun aña despues di e yegada di e Spañonan, pero un grupo Indian cu tabata papia un idioma Arowak yama Caquetio y tabata yama nan mes 'hende/persona' of 'ser bibiente' (Caquetio).
E nomber Aruba probablemente ta un nomber Arowak, siguramente di origin Indian. Ora e Spañonan a ocupa nos isla nan a yam'e Orua, Oruba y Ouruba. Nombernan despues tabata Curava, Uruba, Arouba y Aruba. E prome biaha cu e nomber Aruba a aparece como tal den un documento historico ta na 1526 den e 'Historia Natural y General de las Indias' lib. XX di Gonzálo Fernández Oviedo. Hopi autor a trata di haya e significacion di e palabra Aruba y su origen linguistico of geografico. Algun ta lig'e cu e.o. Tupi-Guaraní (Oirubae kier men 'compañero'), Caribe (Oraoubao kier men 'isla di cocolishi'), Spaño (Oro Hubo kier men 'tabatin oro'), e Golfo di Maracaibo (Aruba lo ta bin di Oruba cu ta un nomber den e Golfo aki), un palabra Indian ('bon situa'), Taino ('Aruboa' ta un antroponimo di siglo 16) y e Golfo di Darien (originalmente Golfo di Uruba locual kier men 'Golfo di Canoanan'). E ultimo teoria ta cu Aruba a ser yama na e Indiannan cu a biba akinan yama e Arubaes (1607) of Arubanas (mitar di siglo 18). Na prome bista e ultimo teoria ta mustra esun mas probable, pero un problema grandi ta cu e nomber Aruba a aparece como tal pa prome biaha na 1526, cu ta hopi prome cu e nombernan Arubaes of Arubanas a aparece den documentonan historico, lagando nos den duda si Aruba a ser yama na e Indiannan, of cu e Indiannan a ser yama na Aruba. Ademas nos no sa mes cu siguridad na cual grupo di Indian ta ser referi ora ta papia di e Indiannan Arubaes of Arubanas (Caquetionan of Indiannan di e Periodo Historico?). Asina ta cu di unda e palabra Aruba a bin y kiko e kier men ainda ta un pregunta cu no a ser contesta.

E Prome Añanan di e Encuentro Entre Dos Cultura (te cu 1515)
E prome añanan e Spañonan no tabata preocupa nan mes mucho pa colonisa e islanan, pasobra e segundo expedicion di De Ojeda na 1502 tabata un fracaso. Pa motibo di hopi error di juicio y crueldad e fiansa a ser revoca, motibo pa cual e islanan a ser poni atrobe bao e Audiencia Hispaniola (Haïti/Sto. Domingo). De Ojeda cu den e añanan tempran tabata e gobernador di e.o. supuestamente Aruba, nunca a pone pia riba nos isla. Pa e tempo aki e Indiannan Caquetio probablemente tabata biba na dos centro importante cu ta Savaneta y (e mayoria) entre Piedra Plat y Noord. Ta ser calcula cu nan cantidad tabata entre 200 pa 300, por ta hasta 400 Indian. E cacique cu tabata domina Aruba tabata yama Simas y ora e Spañonan a establece nan mes pa prome biaha, nan a trece un cacique Indian di Tera Firme yama Golmir cu nan a laga atras cu dos Spaño. Golmir su meta mas importante tabata pa papia cu e Indiannan di Aruba pa nan converti nan mes den Cristianismo. Despues di algun tempo, mas Spaño a bin nos isla y probablemente a bai biba na Sero Cristal. Exploracion y explotacion tabata ser stimula cu Rodrigo de Bastidas explorando e area na 1500, Juan de la Cosa "bishitando" e islanan "di nobo" na 1504 pa kapmento di palo di Brasil y Cristóbal Guerra teniendo mas razzia pa captura esclavo te su morto na 1504. Na 1503 e Corona spaño a haci posibel pa exporta e Indiannan rebelde di e islanan pa traha den e minanan di oro y plata pa e encomiendanan di e kolonistanan na Hispaniola. E poblacion Indian na Hispaniola cu tabata traha den e minanan a disminui hopi liher y ya caba na 1505 e prome esclavonan africano a ser importa. A pesar di esaki, na 1513 e falta di trahador tabata asina grandi cu rey Fernando a duna permiso pa usa e Indiannan di e Islas Inútiles como trahador den e minanan.
Pa ausencia di metalnan precioso y perla, e virrey di Hispaniola, Diego Colón, yiu di Cristobal Colón, a declara Aruba, Boneiro y Corsow como Islanan Inútil, haciendo nan apropia pa caceria di esclavo pa e indieronan notorio of cazadornan di esclavo. Na 1515 Diego Salazar, bao instruccion di Diego Colón, a tuma como 2000 Indian di Aruba, Boneiro y Corsow pa traha como esclavo den e minanan na Hispaniola. Probablemente Martín Baso Zabala tambe a captura un cierto cantidad di Caquetio for di e.o. Aruba. Algun Indian a scapa di deportacion dor di huy pa Venezuela, mientras cu otronan probablemente a keda scondi den e bosque y cuebanan arubano. E resto a ser mata directamente dor di e Spañonan, mientras cu durante e periodo spaño tempran aki un gran cantidad a muri dor di malesanan 'nobo' manera sarampi. Aruba a keda casi deshabita, te cu na 1527 un cantidad di Indian (200) a ser treci back pa e islanan ABC for di Hispaniola. Den e periodo tempran aki no tabatin un fortificacion spaño y con e gobierno spaño tabata organisa exactamente, no ta conoci. Algun oficial di gobierno cu e titulonan di justicia mayor y mayor domo, hunto cu un empleado y posiblemente un "hermano lego" cu nan famianan lo a forma e poblacion spaño, mientras cu e Indiannan tabata bao supervision directo di un cacique bautisa cu un nomber spaño.

Sintesis
E aña aki Aruba ta conmemorando 500 aña di historia scirbi y e encuentro entre dos cultura, cualnan ta e cultura Europeo (spaño) y Amerindio (Caquetio). Pero ta berdad cu e prome documentonan scirbi di Aruba realmente ta fecha di 1499, e aña cual supuestamente e cultura Europeo y Amerindio pa prome biaha a topa otro na nos isla? Hopi autor a trata di reconstrui e prome biahe di e Europeonan banda di e islanan ABC y a bin cu diferente teoria. Aunque tur tin nan propio punto di bista, riba un punto tur ta di acuerdo: no tin ningun clase di evidencia cu Aruba a ser bishita of mira durante e expedicion di De Ojeda na 1499! Dicon anto nos a haci asina hopi fanfaria pa conmemora '500 aña' e aña aki si nos sa cu no tin evidencia pa esaki? Claramente Boneiro y Corsow, cu sigur a ser bishita na 1499 y e aña aki a haci un gran "issue" turistico di esaki, a hunga un rol hopi importante den esaki. Importante pa nos ta pa conoce nos historia manera e ta realmente y no inventa cosnan cu no ta berdad. Nos historia ta suficiente rico pa haci'e un issue turistico y arubano sin inventa hecho. Por ta e autoridadnan concerni mester a haci un investigacion mas profundo pa haya sa e hechonan berdadero! Ni e aña exacto cu e Spañonan tabata sa di e existencia di Aruba y a pone pia riba nos isla no ta claro ainda, pero probablemente esaki mester a tuma lugar entre 1502 y 1505.
Como poco poco e Arubianonan ta interesando nan mes mas den nos isla y su historia, mas hende ta buscando pa haya sa mas di e "teritorio misterioso desconoci" aki. Esaki ta bin parcialmente dor cu e aña aki nos ta conmemorando Aruba 500 aña, pero mas tanto pasobra Aruba rapidamente ta cambiando y evolucionando den un sociedad multi-cultural.
E consequencia ta cu nos kier y mester haya sa kiko nos propio cultura ta y tabata y kiko e historia y origen ta di nos hendenan. Den e contexto aki ta importante pa concientisa nos mes di errornan historico den historia di Aruba, manera p.e. Boneiro y Corsow (indirectamente Aruba?) a ser yama Islas de los Gigantes, pero locual ta mas tanto basa riba fantasia, of cu nos ta yama e Indiannan arubano (Caquetionan: Periodo Ceramico) e Arowaknan, mientras cu nan tabata papia un idioma Arowak yama Caquetio, y ora nan no ta ser yama e Arowaknan, nos ta yama nan e Caiquetionan, mientras cu e nomber corecto ta Caquetio. Por ultimo tin hende cu ta kere cu nan sa e significacion y origen di e palabra Aruba, pero francamente bisa ainda no tin 100% evidencia pa esaki. E unico hechonan cu nos tin ta cu ora e Spañonan a bin Aruba, premedita nan a destrui un cultura Indian cu tabata na punto di top di su desaroyo.
Dor di elimina e creencianan religioso y e idioma nativo, introduciendo malesanan desconoci cu a causa morto, cazando esclavo, matansa, y ultimamente deportacion pa esclavitud, e Spañonan a elimina e cultura Caquetio di nos isla, un proceso irreversible cu a cambia e causa di historia di e nativonan, pero mas cu tur, di nos isla. Pa compronde e eventonan aki, nan mester ser mira den contexto di e periodo concerni y e cosmovision di e Europeonan. Cu e yegada di e Spañonan, e prome paso a ser poni den direccion di un sistema di bida nobo na nos isla cu fuertemente a influencia e siglonan cu a sigui y tabata e comienso di nos raisnan europeo, te un cierto nivel mezcla cu caracteristicanan cultural indian.
Aunque cu hopi siglo a pasa unda cu e cultura Indian a ser oprimi, ainda nos tin influencianan Amerindio riba nos isla, mas tanto den nos idioma nativo, ya cu awe'ndia mas o menos 350 palabra Amerindio ta ser usa den Papiamento di cual un 150 ta palabranan Caquetio original!
 
Articulo di drs.Raymundo A.C.F Dijkhoff