Bida Cristian! Responsabilidad di ken?

Balor di sacramento di Bautismo
E sacramento di bautismo a inicia nos bida cristian. No ta un ceremonia sin mas, pero e bautismo ta trece cu ne e resposabilidad di sigui cuida e bida cristian cu a cuminsa.
E tempo di cuaresma ta duna nos e oportunidad pa reflexiona riba nos bida cristian.
Unda nos ta y kico mester di un cambio ta preguntanan esencial den bida di un hende cristian. Ta p’esei Iglesia riba e anochi di vigilia di Pasco di Resureccion (Diasabra di aleluya of Diasabra Santo) ta duna nos e oportunidad di renoba nos bautismo.
Di nobo na bos halto nos ta profesa nos fe y ta priminti di bira lomba pa satanas y su malicianan. Un bunita oportunidad pa cuminsa biba di nobo nos bida cristian, nos compromiso cu nos Dios y nos Hesus.

E cas di famia:
Un iglesia domestico
E mayornan tin educacion di e yiu(nan) den nan man. Den e cas di famia, den su hogar, e mucha cu ta bai creciendo lo mester comprende e balor di su bida. Ademas di duna e mucha cuminda, paña y un dak riba su cabes nan tin tambe di dun’e su cuido y cariño riba cual e tin derecho. E mester sinti cu e ta stima y acepta! E mayornan mester ta conciente di e balor di nan bida cristian y di balor cristian; entre otro amor, respet, responsabilidad, pordon, fe y oracion. E cas di famia mester ta manera un iglesia domestico den cual e yiu (nan) ta ricibi nan educacion cristian pa medio di ehempel y e parctica di e balornan cristian.

E practica di balornan di bida cristian
Nos bida cristian lo ta den balans ora nos sa con pa biba nos bida. Un hende cristian lo tin cu cuminsa su dia cu Dios su Creador. No ta e cantidad di tempo pero si e calidad di tempo cu nos ta tuma pa Dios y Cristo den nos bida. Nos bida di fe y oracion lo yuda nos y ta duna nos e forsa pa enfrenta cualkier situacion cu lo por presenta. Un cristian ta un hende alegre di sa cu su bida ta depende di Dios. Su confiansa den su Creador y den Hesus su salbador lo yud’e pa e por sigui crece den fe, amor y sabiduria.
E practica di nos fe ta culmina den e celebracion di e dia di Señor, e diadomingo. Hunto cu otro miembro di Iglesia nos ta bai pa celebra nos fe. Nos ta haya e alimento spiritual den e palabra di Dios y e Santa Comunion.
Asina nos ta haya e forsa pa por haci tur loke nos tin cu haci den e siman nobo cu a cuminsa. Como yiu di Dios nos tin e deber di cuida nos bida cristian y spiritual.

Conoce, celebra y biba nos fe!
Iglesia Catolico Romano ta yuda nos, ta instrui nos con pa celebra y biba nos fe. Ta nos deber pa conoce e balor di nos bida cristian y biba esaki optimalmente.
Mayornan a scohe pa e yiu su bida cristian y a priminti di yud’e den su crecemento. Scolnan catolica y catekistanan ta duna un man den formacion religioso y spiritual di e muchanan. Pero e responsabilidad mayor ta keda den man di e mayornan. Cu na prome lugar mester ta conciente di e balor di nan propio bida spiritual, na di dos lugar nan mester conoce e balornan cristian y pa ultimo sa di practica y biba nan.
Iglesia a yama e bebi bon bini como su miembro nobo y ta confia cu e mayornan lo sigui educa e yiu(nan) den su bida di fe.

Celebra e sacramentonan:
Un etapa nobo den e bida cristian
Cada sacramento di iniciacion ta marca un comienso nobo den bida di e mucha. Como bebi el a keda inicia pa medio di su bautismo den e bida cristian. E mucha ta crece den edad, pero tambe den bida spiritual segun e ehempel cu e ta haya. Como mucha di scol basico e ta haya e oportunidad pa celebra su Prome Santa Comunion. E sacramento aki ta su di dos encuentro cu Hesus. Awor e ta un tiki mas grandi y e ta cuminsa na su manera comprende ken ta Hesus. Su prome Santa Comunion ta lag’e tuma parti na e comemento sagrado. Despues di a sera e etapa di mucha di scol, e ta drenta den e scol avansa cu lo yud’e pa pensa y prepara su mes pa futuro. Ta e edad cu lo e busca su mes y su independencia. Si su bida spiritual a keda bon alimenta den su hogar, anto lo e comprende tambe balor di e sacramento di su confirmacion. E sacramento aki ta inici’e den e responsabilidad cu lo e tin como cristian. Lo e comprende cu su bida spiritual ta bai man den man cu su crecemento. E decision cu lo e tuma lo tin consecuencia pa su bida.

Mayornan: cooperador di Dios
Pues mayornan sea conciente di e balor grandi di e educacion cristian di e yiu(nan). Mescos cu ta duna nan di come, bebe y bisti. Duna nan e regalo precioso di fe. Planta pues e simian di amor cu Dios a pone den boso curason den bida di boso yiu. Sea un cooperador di Dios cu boso alma y curason. Resa pa nan y nan como famia, biba boso fe y celebra e dia di Señor pa boso haya e forsa y bendicion pa sigui dilanti como esnan prome responsabel pa e bida cristian di boso yiunan!
Corda cu celebracion di cada sacramento den bida di e yiu(nan) ta inicia un etapa nobo den su bida p’asina e por sigui crece den fe, amor y sabiduria. Di e manera aki e yiu lo crece y madura spiritualmente; lo e haci sigur un diferencia y den futuro lo e contribui como cristian adulto y responsabel na un miho comunidad cristian, un miho Aruba! Dios bendiciona boso ricamente!