E Indiannan Caquetio di Aruba
Introduccion
E prome actividadnan na Aruba a tuma lugar 2500/2000 aña P.C. y tabata e resultado di bandanan di Indian semi-nomadico cu a bin di tera firme. Nan tabata piscador/cazador/recolector cu no tabat'in agricultura ni ceramica, motibo pa cual e periodo ey ta ser yama e Periodo Preceramico (2500 P.C.-1000 D.C.). Pa 900/ 1000 D.C. un otro grupo di Indian a imigra di tera firme pa Aruba cu no tabata diferencia di nan solamente den nan cultura, nan base economico y tabat'in comunidad mas grandi, pero tambe tabata diferencia den aspecto fisico.

E Sitionan
Na Aruba tin 58 sitio clasifica como Ceramico (1000-1515 D.C.), cu 2 sitio di extraccion di piedra (Coashiati, Dos Playa) cu posiblemente tambe a ser usa pa e Indiannan Preceramico, mientras 6 tin restonan Ceramico y Colonial. Mayoria di e sitionan Ceramico ta situa na of ta estrechamente asocia cu e areanan cristalino di Aruba cu tin e mihor condicionnan hidrologico (rooinan) y di suelo, locual tabata hopi importante pa e agricultornan aki. Tres sitio ta califica como aldea (Santa Cruz, Tanki Flip, Savaneta) y 2 como aldea di grandura mediano (Tanki Lender, Parkietenbos), tur cubriendo algun hectare. E resto di e sitionan ta hopi mas chikito y ta ser interpreta como sitionan di explotacion of sitionan chikito di habitacion permanente. E Indiannan cu a biba na Aruba den e Periodo Ceramico tabata culturalmente, socialmente, politicamente y economicamente liga na e Indiannan Dabajuran di tera firme. Nan tabat'in mesun ceramica, a practica deramento diferencial y tabat'in otro aspectonan similar.

West Venezuela
E hayazgonan arqueologico di e Periodo Ceramico na Venezuela y Antiyas ta ser clasifica den estilonan yama serienan. Na West Venezuela esakinan ta desde 1958 e serienan Dabajuroid, Tocuyanoid y Tierroid. Na 1989 nan a ser redifini den e Tradicionnan Macro-Dabajuroid y Macro-Tocuyanoid.

E Tradicion Macro-Dabajuroid ancestral probablemente a cuminsa divergi den e Yanonan, posiblemente na e riw Cojedes entre 1-500 D.C. E rama Dabajuran (Caquetio) a move via e riw Cojedes y Yaracuy y a colonisa oost Falcón, yegando e area di Dabajuro pa mas o menos 800 D.C. Di 1100 pa 1200 D.C. e Dabajurannan a colonisa mayoria di oost Falcón, Coro, Paraguaná y a establece nan mes banda di e riwnan Borojo y Mitare. Pa e tempo aki e Dabajurannan a siña nabega riba lama y a colonisa Aruba, Boneiro, Corsow, Isla del Tesoro y Ave Grande. E fronteranan aki ta coincidi hopi bon cu e nacion etno-historico di e Caquetionan di Costa di Venezuela.

Caracteristiconan di e Sitionan Ceramico (Dabajuran) Arubano

Nobenta porciento di e artefactonan cu ta ser haya den e sitionan di e Periodo Ceramico na Aruba ta ceramica. Tin pochi pa almacenahe, pa cushina, pa transporta, pa sirbimento di cuminda, pochi grandi usa como urna y pochi ceremonial. E formanan basico ta tayo, wea, tinashi y poron. Tambe klei a ser usa pa traha casuela, disco di klei, figurinanan, stempel pa pinta curpa y spindle whorls (kloshi pa hilo).
Mayoria di e hermentnan di piedra a ser traha di tonalit, basalt of dolerit. Manga y piedra di mula (mano y metate) ta ser haya regularmente, mescos cu raspanan pa casave di piedra di candela. Hermentnan pisa tabata hacha, martiw, beitel, cuchu, bola, piedra pa mula y piedra di fogon. Coral a ser usa pa hermentnan pa raspa, mula y lombra, mientras cu cocolishi a ser usa pa traha martiw, perforador, raspador, cuchara, cuenta y hanger. Weso tabata sirbi pa traha hangua y perforador.
Generalmente e deramentonan humano riba nos isla por ser categorisa den 5 diferente manera. E Indiannan Dabajuran Arubano tabata dera nan mortonan den of pafor di nan cas, tin biaha den un area di dump. Mas tanto nan tabata ser dera den posicion di fetus. Cu e cultura di morto tabata hopi complica no ta ser refleha solamente den e 5 maneranan general cu e Indiannan a ser dera, pero tambe e hecho cu mas cu 50% di e skeletnan ta incompleto, cual ta e resultado di ritualnan di pasahe (rites de passage) hopi complica. Hopi biaha e mortonan a ser dera den grupo di 4 pa 6, pero den un grupo asina nunca tin e mesun deramento. Den e aldeanan diferente structura a ser reconoci. Na Santa Cruz y Tanki Flip casnan rondo y oval a ser identifica. Den e casnan rondo 2 famia nuclear tabata biba, mientras e casnan oval tabata casnan comunitario unda famianan extendi of multi-famia tabata biba.

Den e casnan diferente fogon ta ser haya. Tambe structuranan rectangular interpreta como structuranan ceremonial a ser reconoci, mientras cu espacionan entre e casnan a fungi como plaza. Na Santa Cruz y Tanki Flip heki a ser encontra, mientras structuranan den forma di un hoef tambe a ser reconoci. E aldeanan tabata situa banda di e confluencia di rooinan y e rooinan tambe a fungi como rutanan natural di comunicacion entre e aldeanan y otro sectornan di e isla.

Subsistencia y Organisacion Social
E Indiannan di e Periodo Ceramico tabata agricultornan intensivo di maishi y cassave (di cualnan un tipo di koeki tabata ser traha) y posiblemente agave, catuna y tabaco. Probablemente cultivacion di casave y maishi a tuma lugar den hardinnan habri (slash & burn) y hardinnan na rand di rooinan. Agave por a sirbi como fibra pa produci cabuya, macuto, net y hamaka. Bebida toxico tabata ser traha di agave (fique) y di maishi (maçato). Tambe e Indiannan Dabajuran tabata come fruta, tortuga y nan webonan, yuwana, parha, bestia di cocolishi, cangrew, hopi pisca y mamifero chikito. No tin evidencia di animalnan domestico. Figurinanan, representacionnan zoomorfico y antropomorfico riba ceramica, deramentonan complica, pochi pa kima sencia, komchi ceremonial e.o. ta mustra cu e Indiannan Dabajuran Arubano tabat'in un creencia religioso hopi profundo. Aruba tabata bao control social-politico di e Caquetionan di Costa di Venezuela cu riba e escala di desaroyo cultural tabata na e nivel di un paramount chiefdom. Tabat'in: 1. caciquenan local (aldea); 2. hefenan (diaos) di algun cacique local cu tabata controla unidadnan teritorial/social-politico mas chikito (cacicazgos); 3. e cacique supremo (tambe diao) cu tabata na top di e hirarquia. Ta posibel cu na Aruba tur aldea tabat'in un cacique local, mientras cu un hefe di segundo rango tabata controla e region, posiblemente hasta e islanan dilanti di costa di tera firme. Tambe ta posibel cu Aruba tabata forma parti di e sub-grupo di Caquetio yama Guaranaos cu hunto cu e Amuayes tabata domina e Peninsula di Paraguaná, pero tabata subordina na un autoridad supremo central residencia na tera firme. Basa riba e posicion central di e sitio di Santa Cruz, su grandura, e deramentonan den cueba bao di tera na Budui unda por lo menos 3 persona di un status hopi halto a ser dera y otro hayazgonan arqueologico, por ser asumi cu e hefe di segundo rango, cu tabata domina nos isla, tabata biba na Santa Cruz.

Sintesis
E Indiannan Ceramico a yega Aruba mas o menos 900/1000 D.C. di e costa di Falcón y a bai biba na 3 aldea importante: Tanki Flip, Santa Cruz y Savaneta, pero tambe na Tanki Lender y Parkietenbos. Tabat'in un red di sitionan pa pisca, colecta bestia di cocolishi of actividadnan agricultural rond di nan. E Indiannan agricultor aki tabata pertenece na un clan di Caquetio (yama Arubaes na 1607 y Arubanas na mitar di siglo 18) cu na nan turno tabata pertenece na e paramount chiefdom di e Caquetionan di Costa di Venezuela. Tur aldea riba nos isla probablemente tabata habita pa 100-150 Indian y nan tabata socialmente y politicamente hopi mas desaroya cu e Indiannan Preceramico. Pa un tempo hopi largo e 3 aldeanan mas grandi di nos isla tabata habita contemporaneamente y considerando e 2 aldeanan di grandura mediano, na un dado momento den e Periodo Ceramico Aruba tabata habita pa 450-600 Indian Dabajuran.

E Periodo Dabajuran tempran (850-1350 D.C.) tabata un tempo di expansion teritorial rapido y continuo dor di costa di Falcón, un periodo unda posiblemente control dominante riba, of alianzanan silencioso cu, e pueblonan piscador Arcaico riba tera firme y e islanan dilanti di costa Venezolano a ser realisa. Un pregunta cu ta keda ta: "Kiko realmente a pasa cu e Indiannan Preceramico?" Den e sitionan Ceramico 'tecnicanan' y artefactonan Preceramico por ser haya, pero nan por ta e resultado di actividadnan mas bieu di e Indiannan Preceramico. Fisicamente e Indiannan Ceramico tabatin cabes relativamente chikito, hancho y cortico, locual ta un contraste total di e cabesnan halto, smal y largo di e Indiannan Preceramico. E estatura di e Caquetionan na momento di contacto Europeo tabata entre 1.55m y 1.65m, mientras cu e estatura averahe di un homber Preceramico tabata 1.57m y un muher Preceramico 1.49m. Locual ta interesante ta cu e dientenan incisivo den forma di shovel tipico di e Indiannan Preceramico tin biaha ta ser haya cerca e Indiannan Ceramico, mustrando un cierto nivel di mezcla cu of descendencia di e hendenan Preceramico.
Pa haya sa cu seguridad si e dos gruponan totalmente diferente aki a mezcla, un investigacion intensivo di DNA mester ser haci. Arqueologicamente tin un diferencia entre Aruba di un banda y Corsow y Boneiro di otro banda, mientras dos documento historico ta bisa cu na Corsow y Boneiro probablemente un clan diferente tabata biba yama Indios Curaçaos. E nacion di e Caquetionan di Costa tabata hirargicamente structura, mientras den cada aldea tabata existi un structura social elitario cu ta ser refleha e.o. den e variedad grandi di deramentonan riba nos isla. Hayazgonan arqueologico ta mustra cu Aruba tabata pertenece na e area central di e cultura Dabajuroid, mientras cu tabatin contactonan comercial, social y cultural directo of indirecto cu Central Venezuela (area di Valencia), e Peninsula di Guajira (Colombia), e area Andino den interior di Venezuela (e.o. Trujillo), (Nort)West y Oost Venezuela, Corsow y Boneiro. Santa Cruz tabata funciona como e aldea central dominando nos isla; Savaneta tabata funciona como un aldea costal unda lazonan cu e region tabata ser teni y haci mas fuerte, mientras cu Tanki Flip tabata funciona como un aldea interior mas isola di e resto. Net ora e Caquetionan tabata yegando top di nan desaroyo cultural nan a ser interumpi dor di e yegada di e Spañonan cu a destrui nan cultura completamente, culminando finalmente den e matanza y deportacion di tur e Caquetionan original di nos isla pa Hispaniola na 1515 D.C. Lamentablemente esaki tambe ta e aña cu ta marca final di e Periodo Ceramico na Aruba.
 
Articulo di drs.Raymundo A.C.F Dijkhoff