E Prome Habitantenan di Aruba
Introduccion
Aruba su historia ta un relato fascinante di culturanan cu a laga nan marca riba e paisahe, arquitectura y pueblo di nos isla. E prome actividadnan humano na Aruba a tuma lugar den e paisahe cu a origina 95 miyon aña pasa. Pa compronde e comienso di bida humano riba nos isla, nos tin cu tira un bista cortico riba e yegada di e prome habitantenan riba e continente Americano. Esaki probablemente a sosode mas o menos 20.000 aña pasa (por ta hasta 40.000 aña pasa), ora cu bandanan di cazador/recolector di Asia tabata siguiendo animal grandi (mega fauna) y a drenta America crusando e Bereng Strait cu a bira un pasahe durante e ultimo tempo glacial (Wisconsin) entre 80.000-7.000 aña pasa. E prome habitantenan di e parti nort di Sud-America a yega Nortwest Venezuela 16.000 aña pasa na e area di Taima Taima/El Jobo.

E Prome Actividadnan Humano (2500-2000 P.C.)

Probablemente e sitio (tereno arqueologico) mas bieu na Aruba ta Sero Muskita, unda solamente un herment di piedra a ser haya. Na Arikok un herment similar a ser encontra, y basa riba e tecnica cu cual nan a ser finalisa y nan forma, ta wordo pensa cu tabat'in hende na Aruba 4000/4500 aña pasa. Nan por ta e resultado di bishita incidental di tera firme, ya cu e habitantenan di e costa di Venezuela tabata traha herment similar pa miles di aña caba. E prome evidencianan cu nos tin cu Indiannan tabata biba na Aruba ta indica cu pa 500 P.C. nan a haci Aruba nan patria.

E Sitionan
Na Aruba tin 22 sitio cu ta clasifica como Preceramico (2500 P.C.-1000 D.C.), y tur tin cocolishi pero no ceramica. Pa e ultimo motibo e periodo aki ta ser yama e Periodo Preceramico. Mayoria di e sitionan Preceramico ta situa dentro di un kilometer di lama of fuentenan di awa, mas tanto na costa zuid-west, excepto e sitio di Soledad. E lugarnan y hayazgonan ta sugeri un orientacion marino, costal, excepto pa e sitionan di Coashiati y Canashito. Mayoria di sitionan ta shell-middens (capanan di tera cu cocolishi), mientras cu dos a funciona primeramente como santana (Canashito y Malmok). Dos sitio (Coashiati y Dos Playa) as ser usa pa extraccion di piedra. Sitionan Precermico di importancia ta situa riba un superficie di calichi (20 di 22), y actividadnan cultural importante ta asocia cu calichi. Mas tanto informacion cu nos tin di e Indiannan aki ta di e dos lugarnan unda nan a dera nan mortonan; Canashito y Malmok.

Canashito
Na Sero Canashito (70m) den interior di Aruba, tin tres sitio arqueologico; un santana den cueba y dos otro sitio cu contenido grandi di cocolishi. Ademas un di e cuebanan di Canashito tin pictografia (pintura riba baranca). E sitio di Canashito ta data di 500 P.C.-500 D.C., mientras cu e santana ta data di 100 P.C.-100 D.C. Hermentnan di piedra haya na Canashito tabata hopi biaha multi-funcional. Den e santana di cueba un famia tabata dera consistiendo di 5 persona adulto cu un homber di edad avanza dera den centro. Dos di e craneonan tabata artificialmente deforma. Den e cueba di Hato na Corsow tambe un famia tabata dera cu un homber den centro, y e patronchi di deramento tabata mescos. E hayazgonan di Canashito a wordo compara cu e esunnan di Malmok y similaridadnan hopi grandi a ser haya; e mortonan tin mesun postura y e forma di cabes ta tipico na esunnan di Malmok, manera lo ser discuti aki bao.

Malmok
E sitio ta situa riba un tereno grandi arenoso na un distancia di 200m (Z)-300m (N) di lama, paralelo na un saliña antiguo. E sitio ta consisti di un shell-midden data di 1-350 D.C., y un santana data di 450-990 D.C. Den e santana 60-70 persona tabata dera, den cual 15 grupo di famia por a wordo distingui. Den cada grupo hombernan mas bieu cu 25 aña tabatin un posicion central, mientras cu areglonan grandi complica di piedra a ser haya riba nan curpa cu tabata fungi como marcador di lugar y di status. Muher, mucha y homber di status abao tabat'in un areglo mas simpel di piedra y nan tabata dera den e teritorio di e hombernan di status halto, probablemente representando grupo di famia.

Den un teritorio asina hopi biaha grafnan tabata ser haya den par di sexo opuesto sugeriendo matrimonio. Un teritorio di mas o menos 18m di diameter tabata reserva pa cada famia. E planificacion di e santana ta mustra cu el a wordo usa pa un periodo largo y segun regla estricto; e hombernan central di tres grupo di famia tabata forma triangulo di dos banda igual den e parti zuid di e santana, un structura cu ta aparece 6 biaha. Den a parti nort tur e hombernan central tabata dera riba un liña recto nortwest-zuidoost. E personanan tabatin cabes relativamente largo, halto y smal, mientras cu e adulto averahe tabata muri cu mas o menos 35 aña. E estatura di averahe di hende homber tabata 1.57m y hende muher 1.49m. E Indiannan aki tabatin musculo fuerte y weso pisa, locual ta describi nan como hende relativamete chikito y fuerte.
Caries, enanismo, jorobado y arthrosis a ser identifica cerca algun di nan. Diferente di e dientenan di e Indiannan aki tabata hopi gasta, indicando cu nan a usa esakinan como herment. E cabesnan di hopi di nan a ser pinta cora prome cu nan a wordo dera. E tinta aki a ser compara cu e tinta di e pictografianan di Aruba, pero nan no tabata mescos. Mayoria di e skeletnan tabatin un man poni na nan cabes y tabata drumi riba nan banda (posicion di fetus).

Hopi graf tabatin cocolishi como regalo, mientras cu 10% di e personanan tabata dera riba of bao di un carpachi di tortuga di lama. E shell-midden ta por lo menos 100 aña mas bieu cu e prome actividadnan di deramento, locual kiermen cu e Indiannan a selecta e cocolishinan di e midden pa actividadnan di deramento sabiendo cu nan tabata obhetonan di nan antepasadonan. Esaki ta ser interpreta como "gruponan descendiente basa riba teritorio" poniendo enfasis riba nan relacion cu nan antepasadonan. Probablemente generacionnan sucesivo di un banda tabata dera nan mortonan den e santana bon organisa aki.

E patronchi di deramento di Malmok, e relacion cu piedranan riba e mortonan, un man descansando contra cabes, e restonan di tortuga di lama, y e mesun tipo di cabes, ta mescos cu a ser haya na e sitio di
St. Michielsberg na Corsow. Paralelnan hopi impresionante pa e sitionan na Aruba y Corsow a ser haya na Cuba y Colombia; deramento di grupo, tinta cora den santana di cueba, postura similar di deramento, y forma di cabes comparable ta ser haya den deramentonan Preceramico di Colombia (Sabana de Bogotá). Posturanan similar, tinta cora riba skelet, relacion di man-cabes, deramento di grupo chikito den cueba, deramento di grupo den area di un midden, y santananan grandi di 30-40 individuo ta ser haya den deramentonan Preceramico Cubano (Ciboney).
E santana di Malmok tabata funciona como marcacion di teritorio, sabiendo cu cazadornan/recolectornan tin e tendencia di marca nan teritorio cu santana. Na otro parti di mundo santananan tambe a surgi na final di e Periodo Preceramico, y ta ser interpreta como un exprecion di teritorialidad, un residencialidad stabil incrementa asocia cu cambionan economico.

E Bida Preceramico Arubano
E Indiannan Preceramico tabata piscador/cazador/recolector cu no tabatin agricultura, ni ceramica, y tabata biba den banda familiar chikito semi-nomadico (10-15 persona). Nan tabata explota e recursonan natural di Aruba, come pisca, bestia di cocolishi, tortuga di lama y nan webonan, yerba, simiya manera dader di cadushi, y bestia chikito. Nan hermentnan tabata traha di piedra, cocolishi y probablemente di material organico (palo). A pesar cu nan tabata biba den banda chikito, nan tabata bon organisa manera e santana di Malmok ta refleha. Probablemente diferente grupo similar tabata biba na diferente parti di Aruba, cada un cu nan propio teritorio unda nan actividadnan di colecta tabata tuma lugar, pero presion riba e recursonan ocacionalmente a hunga un rol importante, motibo pa cual un santana manera esun di Malmok a surgi, pa enfatisa nan derechonan tradicional pa usa e area. E banda di Malmok probablemente tabata dividi den dos clan; un clan di nort unda poco graf tabatin cocolishi, y un clan di zuid unda un relacion positivo entre cocolishi y graf a ser haya.
E artefactonan di piedra di e periodo aki na Aruba nunca a ser investiga profundo, motibo pa cual ta dificil pa asocia e Indiannan Preceramico di nos isla cu e dos areanan cultural di Venezuela di e periodo aki; Manicuare (Oost Venezuela; 2500-1000 P.C.) y El Heneal (West y Central Venezuela; 4000-1000 P.C.). Evidencia ta mustra cu e Indiannan Preceramico di Aruba a bin di e continente Sudamericano; un teoria ta bisa cu nan a bin via di Corsow pa Aruba (y Boneiro), mientras cu e otro ta bisa cu nan a bin directamente di tera firme despues cu nan ancestronan a migra den direccion oost via di Centroamerica y Colombia a lo largo di e costa nort di Sudamerica colonisando Aruba (Corsow y Boneiro). Lamentablemente nos no sa cua idioma nan tabata papia, con nan tabata yama nan mes, of cua grupo etnico nan tabata.
E Periodo Preceramico na Aruba ta cuminsa 2500 P.C. y ta dura te cu 1000 D.C. cu e yegada di e prome hendenan Ceramico agricultor, arqueologicamente yama e hendenan Dabajuran y historicamente conoci como e Caquetionan, cu no tabata diferencia di nan solamente den nan cultura y nan base economico y tabatin comunidad mas grandi, pero tambe den nan aspecto fisico. Un pregunta grandi ta: " Kiko a pasa cu e Indiannan Preceramico?" Nan a ser mata? Nan a huy? Of nan a ser absorba den e bida Ceramico? Na diferente parti di e region aki e bida Preceramico a sobrebibi te den e prome milenio D.C., manera e Indiannan di Malmok, implicando cu por a bin un simbiosis entre e Indiannan Preceramico y Ceramico. Presion di gruponan mas avansa manera e comunidadnan grandi Ceramico, por a ocasiona e cambionan den e sociedad di Malmok; e Indiannan Preceramico a sinti nan mes amenasa dor di e yegada di e Indiannan "nobo" Ceramico cu pa 800 D.C. a yega Nortwest Venezuela, y pa 1000 D.C. tabata colonisando Oost Falcón, Coro y Paraguaná.
Articulo di drs.Raymundo A.C.F Dijkhoff