UN CALCULACION DI E CANTIDAD DI HENDE CU TIN PAPIAMENTO COMO IDIOMA MAS PAPIA

Pa Aruba e siguiente datonan di Censo Aruba 2000 ta disponibel. E poblacion di Aruba ta di 90.506 habitante. E cantidad di habitante cu tin Papiamento como e idioma mas papia na cas ta di 59.984, loke ta un porcentahe di 69.4% di tur esnan cu ta papia un idioma (86.408). Pa e idioma Spaño e porcentahe den e categoria aki ta di 13.2%,
Ingles 8.1% y Hulandes 6.1%. E porcentahe di 70% (afgerond) di e poblacion cu tin Papiamento como e idioma mas papia na cas ta ser usa den articulonan y publicacionnan (CBS Aruba, CENSO ARUBA 2000:77).
Pa mayoria di esnan cu tin un otro idioma como nan prome idioma, Papiamento ta e di dos idioma mas papia. Pa e segundo generacion di e categoria aki Papiamento ta bira mas importante como e idioma mas papia. Den terminonan general Papiamento ta e idioma mas papia na Aruba.

Pa Antiya Hulandes e siguiente datonan di Censo 2001 ta disponibel. E poblacion di Antillas ta di 175.653 habitante. E cantidad di habitante cu tin Papiamento como e idioma mas papia na cas ta di 114.835, loke ta 65.4%. Den e mesun categoria pa
Ingles 15.9%, Hulandes 7.3% y Spaño 6.1% di e habitantenan. E porcentahe di e idioma Ingles ta relativamente halto, pasobra na Sint Maarten, Saba y Sint Eustatius Ingles ta e idioma mas papia.

Pa e isla di Corsou e siguiente datonan ta disponibel. E cantidad di habitante cu tin Papiamento como e idioma mas papia na cas ta 106.054, loke ta un porcentahe di 81.2%. Pa e idioma Hulandes e porcentahe den e categoria aki ta 8%, pa Spaño 4% y pa Ingles 2.9%. Den e mesun categoria pa Boneiro ta: Papiamento 8.059 habitante, loke ta un porcentahe di 74.7%, Hulandes 8.8%, Spaño 11.8% y Ingles 2.8% (CBS Nederlandse Antillen, CENSO 2001).
Compara cu Aruba e porcentahe (69.4%) di e habitantenan cu tin Papiamento como e idioma mas papia na cas, ta mas halto na Corsou (81.2%) y Boneiro (74.7%). E porcentahe pa e idiomanan Spaño y Ingles ta un poco mas halto na Aruba.

Si haci un combinacion di e datonan di Censo 2000 di Aruba y Censo 2001 di Antiya Hulandes nos ta yega na e siguiente cantidad. E cantidad di habitante di Aruba y Antiya Hulandes cu tin Papiamento como e idioma mas papia na cas ta 174.819 habitante.

Pa Hulanda e siguiente datonan ta disponibel. E cantidad di Antillano y Arubiano cu ta biba na Hulanda ta di 117.089 habitante (prome y di dos generacion). E cantidad di prome generacion ta di 76.826 habitante (Centraal Bureau voor de Statistiek, Voorburg/Heerlen: 1 januari 2001). Pa e di dos generacion e idioma Hulandes ta bira mas importante como idioma mas papia.
Si usa e promedio di e porcentahe di Aruba y Antiya Hulandes (67.4%) di esnan cu tin Papiamento como e idioma mas papia na cas, nos ta yega na un calculacion di sigur 51.781 habitante di e prome generacion cu tin Papiamento como e idioma mas papia na cas na Hulanda. Den un combinacion di e datonan di Aruba, Antiya Hulandes y Hulanda nos ta yega na un calculacion di un total di 226.600 persona cu tin Papiamento como e idioma mas papia na cas. Si usa e porcentahe di 67.4% pa e di prome y di dos generacion hunto, nos ta yega na un calculacion di 253.737 habitante cu tin Papiamento como e idioma mas papia na cas.

Un calculacion di 226.600 hende cu tin Papiamento como e idioma mas papia na cas na Aruba, Antiya Hulandes y Hulanda, hunto, por ser usa.