CCDN lo reconoce vitrina mihor decora e aña aki
Publica bo vitrina mundialmente riba website di ICA

Dia di Himno y Bandera ta un di e fiestanan nacional mas celebra rond di Aruba. Nos simbolonan nacional ta parti importante di nos identidad y orguyo nacional, pesei tur aña Comision Celebracion Dianan Nacional ta promove esaki na diferente forma. E peticion e aña aki atrobe ta pa empresa decora nan vitrina of oficina den ambiente di Dia di Himno y Bandera. E custumber aki ta birando un tradicion cerca hopi y e creatividad expresa pa cu esaki no conoce limite. Conciente di esaki, pero tratando di duna reconocimento apropia na esnan cu ta haci esaki, CCDN e aña aki ta desea pa tur hende cu tin decoracion pa cual nan ta orguyoso di dje haya e oportunidad pa comparti esaki cu henter mundo.

Mustra bo decoracion di cas, vitrina, of club riba internet:
Mustra bo bandera, color of simbolo nacional prominente, pero no limita bo mes na solamente articulo tradicional. Laga bo imaginacion, inspiracion y inovacion core liber y haci bo creacion bira algo original, artistico y digno di un homenahe di nos identidad y tur loke Aruba ta representa. Raporta esaki na CCDN y esaki lo keda publica den un galeria di potret riba e website di Instituto di Cultura (www.institutodicultura-aruba.com) y esaki lo participa pa yega na remarke pa un reconocimento special como premio. Si acaso bo por manda un potret na Instituto di Cultura Aruba (ICA), cerca Yvette Lacle, of si bo tin un version digital por manda esaki na admin@institutodicultura-aruba.com of por pidi asistencia cu sacamento di potret tambe telefonicamente of via fax: 583-5034. Lo manda un fotografo na bo establecimento.

-- FIN --