Horta bandera for di palo di lus ta un delito castigabel cu tempo den prison

Tur aña Comision Celebracion Dianan Nacional (CCDN) y Ministerio di Cultura ta tuma nota cu antisocial ta horta bandera cu D.O.W. ta pega na palo di lus na ocasion di e celebracion di dia di Himno y Bandera of otro fiesta nacional. E echo lamentabel aki ta di condena ya cu no ta trata di un acto di vandalismo cu ta kita un decoracion publico pero ta trata di un delito. Cu e comunicado aki CCDN kier manda un aviso na esnan cu ta haci nan mes culpabel di e delito aki pa nan ta conciente di nan acto ya cu esaki por tin consecuencia penal pa nan y e aña aki ta haci un apelacion special na nos Cuerpo Policial pa actua fuertemente contra esaki.

Ta asina cu tur e banderanan aki ta propiedad di Pais Aruba, comokiera cu kitando esakinan sin permiso ta igual na robo cual ta contra lei. Es mas cu e bandera ta representa e pais Aruba como e simbolo di mas halto di pais Aruba segun decreta den e Ordenansa di Bandera Nacional (AB 1991 no. 118). Ta considera robo of desacramento di bandera di bo pais un delito severo cu ta castigabel tanto cu boet como tempo sera na prison.

Un suplica ta bai na tur persona cu por tuma nota di si un acto asina tuma lugar pa avisa Polis di inmediato y denuncia e abuso aki cu ta tuma lugar.

-- FIN --