CELEBRACION DI DIA INTERNACIONAL
DI LENGA MATERNO 2004
FESTIVAL DI CONTAMENTO DI STORIA MESTER BIRA TRADICION
Na 1999 UNESCO a proclama dia
21 di februari como Dia Internacional di Idioma Materno. Meta principal
ta pa riba e dia aki dedica atencion special na Idioma Materno y na su
balor pa educacion y desaroyo di hende y di henter un pueblo. Mas y mas
nos ta bira conciente di e hecho, cu un di e tesoronan mas grandi cu hende
tin, ta su idioma, den cua e ta pensa y expresa su mes. Y mas y mas nos
ta bira conciente tambe di e hecho, cu un pais mester percura, pa e idioma
materno, cu por ta diferente pa cada individuo, sigur den un pais multicultural
y multilingual, sigui desaroya cerca cada individuo pa e por uz’e
optimalmente. Uzo optimal kier men bon uzo di su idioma den bida diario,
den estudio y den trabou. Cada individuo mester por desaroya diferente
habilidad den su idioma materno: e mester por scucha y lesa na un manera
comprensivo y critico, e mester por skirbi expresivamente y productivo,
e mester tin un habilidad grandi pa expresa su mes oralmente na un manera
rico y varia, e mester por aporta na su comunidad cu idea nobo, e mester
por razona. Y asina nos por sigui menciona hopi mas habilidad cu tin di
haber cu dominio di idioma y educacion di pueblo.
Pesei Aruba por ta orguyoso di e hecho cu den aña 2003 porfin a
reconoce Papiamento oficialmente como idioma nacional. Asina a kita hopi
obstaculo for di caminda pa Papiamento drenta nos enseñansa, no
solamente como materia, sino tambe como idioma di instruccion. Y esaki
ta hopi importante, pasobra ta via bo idioma bo por cera conoci cu otro
area di conocemento y bo por sigui desaroya. Nos ta sigur cu Papiamento
como idioma di instruccion den nos enseñansa lo beneficia Aruba
den tur sentido: entre otro nos muchanan lo tin mas placer den siñamento
y como consecuencia di esei mas exito den nan estudio; nos lo haya un
pueblo lesado y critico; nos lo haya mas produccion oral y skirbi na un
Papiamento di nivel.
Dia 21 di februari a cai den
e fin di siman di culminacion di Carnaval 50 y pesei mester a pospone
e celebracion.
Instituto Pedagogico Arubano (IPA), Instituto di Cultura Aruba (ICA),
SIMAR, Biblioteca Nacional di Aruba (BNA) y Editorial CHARUBA a uni forsa
y a organisa un Festival di Contamento di Storia cu a tuma luga diasabra
dia 6 di maart di 6 or pa 11.30 or di anochi na sede di SIMAR na Sabana
Blanco 36.
Bintitres contado di storia (‘hechado di cuenta’) a presenta
casi trinta bunita storia pa grandi y chikito.
Mayoria di e storianan tabata na Papiamento, dos na Hulandes y un na Spaño.
Lamentablemente e storia na Ingles no por a sigui, pa motibo di un kebrante
di salud di e contado.
E contadonan di storia tabata: Swinda Arendsz, Rubia Bernabela, Hubert
“Lio” Booi, Poppy Caciano, Ica Croes, , Roberto Croes, Lidia
de Cuba, Eta Geerman Astrid Gietel, Calista Gunsam, Claudette Hoen, Tamira
Kars, Madeleine Kelly, Belén Kock-Marchena, Maureen Luidens, Diana
Marchena-Martis, Rensley Mathilda, Munje Oduber-Winklaar, Roland Peterson,
Eveline Ruiz-Croes, Solaida Suarez, Jacques Thönissen, Titi Tromp.
E storianan tabata hopi varia: tabatin cuenta di hada, fabula, storia
di suspenso, storia humoristico, storia tristo, tanto pa mucha, como pa
hende grandi.
Tabata interesante pa wak y scucha
e diferente formanan di conta storia: tabatin storia conta, tabatin storia
lesa; tame tabatin diferente medio, entre otro buki gigante , ilustracion
grandi na muraya, kamishibai, powerpoint, acompañamento cu ritmo,
artefacto pa crea ambiente; esun ta usa henter su curpa ora di conta,
e otro ta solamente su bos.
Y un publico grandi a bin y a gosa. E adultonan a keda te fin pa scucha
cada storia y pa duna cada contado di storia e atencion cu e merece.
Marion ‘Onty’ Lopez a fungi como maestro di ceremonia: un
tarea dificil, como cu e mester a guia henter e festival cu a tuma luga
den dos espacio pareu. El tabata guia y evalua e situacion continuamente
pa tuma e decisionnan corecto ora mester haci cambio den e programa pa
tur cos cana bon .
Tabata un anochi sumamente placentero cu mester ripiti.
A resulta cu: Contamento y scuchamento di storia t’ei ainda, anto
pa keda!
-- FIN --