E aña aki tin hopi producto inovativo y vitrina decora cu tema di Himno y Bandera
Cuerpo di hurado lo anuncia ganadornan diamars awor

Tur parti ta bisto e entusiasmo cu ta reina pa loke ta e celebracion di Himno y Bandera. Hopi establecimento a dorna nan vitrinanan of oficinanan den espirito di nos simbolonan nacional. Un cuerpo di hurado di Comision Celebracion Dianan Nacional (CCDN), consistiendo di señor Mundo Albus, Jossy Maduro y Erwin Brete, a pasa rond Aruba e fin di siman aki pa compila puntuacion di esnan mas resaltante cu lo bin na remarke pa premio.
Ademas di esaki tin un cantidad mas grandi cu nunca di producto cu simbolo nacional riba mercado. Banda di e acostumbrado T-shirt, pechi, lenso y banderin, e aña aki por a constata hopi otro producto inovativo cu ta engrandece e celebracion nacional aki unda simbolo di nos identidad ta claramente reconocibel.
Riba e reportahe grafico adhunto por mira un muestra di e tantisimo vitrina y producto cu ta circulando e aña aki.

-- FIN --