Monoliths

Access Art conhuntamente cu Fundacion Pro Crea ta presenta e exposicion ?Monoliths? cu guia di e artista renombra local Ciro Abath.
Ta trata aki di un artista versatil cu un trayectoria largo tanto como artista y alabes como educado.

E labor artistico di Ciro Abath ta mustra un madures cu ta resultado di practica y investigacion continuo demostrando un estilo bon defini y hopi simbolico.
E esencia di e obra di Ciro Abath ta un mescla di naturalesa y forma organico combina cu ceramica of hero cu ta refleha e archetiponan di cultura bieu cu a desaparece hopi tempo caba cu ta testigo di cambio y paso di tempo.
Archetiponan cu ta testigo silencioso di e transformacion di pasado pa presente na un forma humilde y resigna.
Di e forma aki tambe ta trata e proceso mistico di bida y morto.

Ciro ta presenta su coleccion cu a ser crea na European Ceramic Work Centre (EKWC) na Hulanda cu ta un centro hopi reconoci pa investigacion y desaroyo riba tereno di ceramica.
E centro aki ta un laboratorio di creatividad cu meta pa stimula e proceso artistico y investigacion riba e ramo aki.

E meta principal pa Ciro Abath tabata pa logra unifica metal basha cu ceramica.Y e resultado ta un serie di obra yama ?Monolito Skerpi?
Cual ta cuminsa cu e idea basico di e obheto pre-colombino cu ta ser usa pa cuchiu of hacha cu ta bira na mes momento un imagen of simbolo di realidad actual unda cu odio y guera ta hunga un rol significante.
For di diferente perspectiva por analisa e obranan aki cu por ser mira como simbolo di pelea y agresion of como un simbolo silencioso di control.

Ciro Abath tin un carera artistico extenso cu varios exposicion na galeria local cu ta sigui su estudio na Academie voor Beeldende Vorming na Tilburg Hulanda y tambe su periodonan di estudio na Keramisch Werkcentum, Heusden, y International Summer Academy of fine Arts na Salzburg,Austria.
Su exposicionan internacional ta entre otro ?Karibische Kunst Heute? na Kassel Alemania na aña 1994 y 23 Bienal Internacional di Sao Paolo, Brazil na aña 1996 y tambe e di 7 Bienal di Habana Cuba, na aña 2000.

Pa Access Art Gallery y Fundacion Pro Crea ta un gusto pa presenta un artista cu ta un di nos grandinan den arte cu su exposicion ?Monolito?.

Publico en general ta keda bonbini na Access Art Gallery pa un bishita guia pa Ciro Abath.
Pa mas informacion por tuma contacto cu tel:5887837.

-- FIN --