Minister Lee ta felicita y gradici pueblo di Aruba cu celebracion di 50 aña di carnaval

Despues di por a experiencia cu goso y alegria e paradanan culminante di nos Carnaval 50 durante fin di siman, Minister di Cultura, sr. Ramon Lee, ta felicita y gradici henter comunidad di Aruba cu e celebracion cu ta tras di lomba. E digno y culto pueblo di Aruba a sa un biaha mas di uni den un celebracion cultural, lagando un banda tur diferencia cu por existi y a haci di e eventonan un berdadero goso y alegria cual nos tur por ta orguyoso di dje.
Pa e motibo aki Minister Lee ta felicita y yama danki na un y tur cu di un forma of otro a yuda haci e carnaval aki bira algo grandi, historico y sumamente bunita y exitoso. Particularmente un felicitacion na SAC, e Fundacion cu a carga riba su lomba henter e logistica y responsabilidad pa hinca y ehecuta e programa y actividad. Na e grupo di boluntarionan aki, guia dor di señora Tecla Kelly y Rene Ridderstat ta bai un danki sincero di curason. Boso esfuerso sigur no ta enbano. Na Cuerpo Policial Arubano tambe mester bai un mencion special, ya cu nan a sa di implanta nan presencia tur caminda y cu esei e respet, disciplina y ordo, cu no a permiti cu ningun incidente grandi a tuma lugar y a mantene tur cos bou di control.
Tambe Minister Lee ta gradici tur doño di negoshi cu a scucha su yamada pa duna diasabra atardi liber na nan empleado como un gesto pa engrandece parada di carnaval y muy en particular esun di San Nicolas. Na momento cu Minsiter Lee a pasa riba henter ruta na San Nicolas el a keda satisfecho cu e gran acohida cu e parada aki tabata tin y tur e apoyo cu el a sinti di esnan cu a logra haya e atardi liber pa gosa di dje. Danki na gremio comercial cu a sa di coopera cu nos carnaval, sea dunando liber of patrocinando carnavalista.
Un mencion di honor tambe mester bai pa Serlimar cu a sa di pone su tropanan cla manera un armada bon disciplina cu a baha fuertemente tras di e last lap pa haci limpiesa di nos cayanan. Sumamente impresionante y efectivo, sigui asina.
Igualmente no por laga afo, e tremendo labor cu prensa local a haci durante henter e temporada dunando cobertura na tur actividad y alabes stimulando un participacion continuo na nos Carnaval. Durante di parada grandi por a tuma nota cu hasta prensa internacional tambe a bin graba e evento special aki.
Por ultimo pero no menos importante ta e propio carnavalista, sea esnan cu a participa den parade, cu a inverti den trahe y carosa fantastico, of esnan cu a para na banda apoya, como tur esnan cu di un of otro forma tras di cortina a duna un man, un abraso di pabien grandi y hopi danki. Carnaval 50 tabata exitoso y ta danki na boso esfuerso. Sin laga un hende of instancia afo Minister Lee, ta gradici un y tur cu e celebracion cu ta tras di lomba.