Concierto na Cas di Cultura Aruba di “Cuarteto de Cuba”

Diamars dia 27 di april 2004, Movemento Pro Arte Arubano ta presenta un concierto di un Cuarteto di Cuba cu ta consisti di un pianista, clarinetista y dos violinista. E concierto ta tuma lugar na Cas di Cultura y ta cuminsa pa 8:30 di anochi.

Na aña 2002, Aruba tabatin e previlegio di disfruta di e excelente presentacion di e Duo Calamus (piano y clarinet) cu a wordo aplaudi grandemente na Aruba y Corsou.

E biaha aki nan ta bishita nos atrobe acompaña pa dos magnifico violinista, cu a graba un CD cu colaboracion cu musiconan di Corsou, titula; “Recuerdo di Siglo XX” cu Wals, Mazurka y Danza di compositornan Antiyano.

E cuater excelente musiconan aki ta:

Paula Suarez Quijano, graduado di piano na Instituto Superior de Arte y tambe a studia na concervatorio di Rusia, P.I. Tchaikovsky. Actualmente e ta dirigi e departamento di musica di camara na I.S.A na Havana.

Walter Lopez clarinetista virtuoso, graduado di ISA kende tin un enorme reconocemento como solista na Cuba y pafo di Cuba. Walter a gana varios concurso.

Alfredo Muñoz, Solista di e orquesta Sinfonica Nacional di Cuba kenda tin hopi experiencia como interprete y profesor. El a participa den numeroso festival internacional entre otro na Alemania, Spaña, Rusia, Checoslovakia, Hulanda (Concert Gebouw) Mexico y hopi otro.

Fernando Muñoz del Collado ta e interprete mas hoben di e grupo. Cu edad di 9 aña el a toca cu e orkesta Sinfonica e dobel concierto di J.S. Bach y dos aña despues el a interpreta, como solista, e concierto den Sol Mayor di Mozart acompaña pa Sinfonica Hubenil. E talentoso hoben aki a participa na diferente festival na Peru y a gana varios concurso. Actualmente e ta un studiante di ISA y ta miembro di e orkesta Sinfonica Hubenil cu a wordo inaugura bou batuta di e mundialmente famoso director Claudio Abado. Nan lo interpreta obranan di e.o.: Guastavino, Vitier , Bela Bartok, Leclair, Paquito de rivera, Boskaljon, da Costa gomez, Hidas Fritges, Danilo Aviles, Rufo Wever y Don Ramon Krozendijk.

E artistanan invita di Aruba lo ta; Daimis Alvarez-Garrido (flauta), Jose (Doodle) Sophia (cuarta), Franky Janga (bajo), Rudolfo Valentino (Vale ) Croes (canto). Esakinan lo e join grupo cu piesa crioyo.

Carchi obtenibel na: Boekhandel Van Dorp (Dakota), Plaza Bookshop (Dakota), Boekhandel Mariska, Cliffix Musical Instruments na San Nicolas y na porta prome cu e concierto.
Nos ta spera bo sin falta.

-- FIN --