Ta busca hoben talentoso pa obra Musical-Educativo durante apertura Olimpiada Escolar ta na caminda

Denter di poco lo tuma lugar Olimpiada Escolar G. F. “Betico” Croes 2004, den cual e aña aki tanto scol preparatorio, basico y secundario ta participando den varios actvidad deportivo. E apertura ta planea pa tuma lugar dia 7 di mei benidero pa 5’or di atardi na Stadion Guillermo Prospero Trinidad y ta priminti di bira un espectaculo sin igual.
Esaki ta oportunidad tambe pa e hoben participa den e espectaculo di apertura aki y mustra su talento. Ministerio di Labor, Cultura y Deporte ta buscando hoben entre 12 y 15 aña, specialmente esnan cu tin talento di baile (tumba specialmente) pa participa den un obra titula: “Na Unda Nan Ta?” E presentacion impactante aki sigur lo ofrece e hobennan aki un oportunidad di mustra henter Aruba nan talento, ta crea y dirigi dor di nada menos cu e docente di teatro J. Freddy Montoya di Instituto di Cultura Aruba.
E mini-obra musical educativo aki “Na Unda Nan Ta?” ta ilustra e wega di antes cu awendia ya a lubida y remplasa pa e.o. wega electronico y computer. Den esaki e participante lo mustra con den e temponan aya, e mucha tabata traha su propio cos di hunga, manera por ehempel, bala di mea, popchi traha di boter cu cabei di cabuya, tapa cara, wega di kiniki, wega di trom, wega di cowboy cu cabai di palo di basora, etc. Pa esnan di poco mas edad e lo ta un biahe nostalgico y pa hoben lo ta educacional, treciendo seguramente e dos generacionnan aki mas cerca di otro combinando recuerdo y curiosidad. Pa e participante e ta un oportunidad unico di haya instruccion profesional, haya exposicion nacional y haci contacto cu por conduci na desaroyo mas aleu di talento hoben.
Esnan cu ta interesa pa forma parti di e elenco di e grandioso obra educativo aki, por inscribi libremente na seccion di teatro di Instituto di Cultura Aruba na tel: 582-2185/583-1618/583-8660 durante orario di oficina (7:30-12:00/1:00-4:30). Puntra pa Marlene Lampe of Stanley Dabian. Pa mas informacion acudi na pagina web www.institutodicultura-aruba.com of pasa personalmente, busca un formulario di inscripcion y schedule di ora y lugar di ensayo na Instituto di Cultura Aruba, djis pabou di misa na Playa. Ta spera cooperacion pa asina hunto, nos por duna sosten na tanto deporte como cultura di Aruba.

-- FIN --