Museo Arqueologico Aruba ta presenta Herencia Inmaterial
Ofishi di piscador antes y awor.
primi
pa wak e mas grandiManera ya ta custumber, e ultimo
diadomingo di luna Museo Arqueologico Aruba lo ta habri pa publico diadomingo
awor. E biaha aki, Museo Arqueologico lo pone atencion riba e ofishi di
piscadornan y e conocemento cu esaki ta encera. Por ehempel: e conocemento
di e lugarnan di pisca, e manera di pisca y e materialnan, cu segun tradicion,
mayoria biaha ta pasa di generacion pa generacion. Esaki ta en coneccion
cu e celebracion di Dia International di Museo, cu tabata dia 18 di mei
ultimo cu tin como tema e aña aki “Museonan y Herencia Inmaterial”.
Hunto cu Centro di Pesca Hadicurari lo tin un exposicion di materialnan
di e ofishi di piscador di antes y awor na museo. Pa 11.30’or di
mainta te cu 12.30’or di merdia señor A. Giel lo duna un
presentacion tocante e ofishi di piscador, cu un introduccion illustrativo
di drs. B. Boekhoudt.
Herencia Inmaterial Cultural
ta encera entre otro: “e conocemento, ofishi, creatividad y otro
elementonan intelectual cu a ser desaroya pa un grupo y cu den algun caso
ta ser pasa di generacion pa generacion”. Esaki ta sigur e caso
den e ofishi di piscador tradicional. Otro ehempelnan di Herencia Inmaterial
Cultural na Aruba ta entre otro nos idioma, fiestanan folklorico manera
San Juan, tradicion musical manera Dande y e conocemento di agricultornan
y esnan cu ta construi casnan, transhi y trankera na un manera tradicional.
Mester enfatiza cu mescos cu mayoria pais na mundo e Herencia Inmaterial
na Aruba mester bira e enfoke di estudio den proximo añanan.
Museo Arqueologico Aruba ta invita tur interesado pa pasa diadomingo 30
di mei 2004, entre 11’0r di mainta te cu 2’or di atardi na
Instituto di Cultura Aruba, J.E. Irausquinplein 2 A, (patras di misa San
Fransisco).
------------------------------------------------------------------------------------------------------------
Pa mas informacion tocante e comunicado aki, por tuma contacto cu Museo
Arqueologico Aruba, Departamento Educativo, tel. 5828979/ 5889961
-- FIN --