Na Caminda pa Fiesta Cultural di San Juan
Preparacion pa grandioso celebracion otro luna

Dia 24 di juni ta dia di San Juan of manera conoci den boca di pueblo dia di “Dera Gai”. Di awor caba ta haci un yamada na tur culturista, Centro di Bario, grupo di baile, artesano, amante di cultura Arubiano y tur hende interesa, pa prepara pa haci e fiesta tradicional di nos comunidad algo grandi atrobe e aña aki.
Ya caba un Comision organisado, encabesa pa Instituto di Cultura Aruba (ICA), conhuntamente cu Fundacion Dera Gai y MAMBO a cuminsa reuni riba encargo di Minister di Cultura, sr. Ramon Lee, pa presenta un programa di e celebracion aki. Pronto lo cuminsa tuma contacto cu tur instancia den nos comunidad pa duna un man y haci e fiesta cultural aki uno inolvidabel. Despues di un exitoso set di charla riba aspecto di Dera Gai algun siman pasa, diaranson awor ICA un biaha mas lo ta escenario di un presentacion y exposicion di e Fiesta di San Juan, diaranson awor 2 di juni. Un hoben coriendo su etapa di entrenamento a hinca un tremendo programa den otro y ta invita henter comunidad pa atende esaki diaranson awor.
Ta spera e aña aki un cantidad nunca antes bisto pa loke ta trata participacion di centro di bario, artesano cu obranan special pa e festival di Dera Gai, empresa cu vitrina y otro adorno den colo tradicional, grupo di baile y grupo folklorico. Ademas di e tradicional celebracion den bario ta premira un evento cultural recreativo den centro di Oranjestad y kisas tambe uno na San Nicolas. Por spera un defile di gruponan, tanto folklorico como di baile, pa exhibi trahenan tipico y mucho mas sopresa agradabel.
Minister di Cultura ta reta e creatividad di nos hendenan, specialmente e artista y comerciante, pa trece producto inovativo riba mercado na un prijs rasonabel pa asina tur hende expresa nan amor pa nos cultura. Prome cu juni 24, dia di San Juan, lo tin atrobe un mercado popular combina cu exposicion di obra di arte, relaciona cu dia di San Juan of Dera Gai. Aki kier trece hunto tur hende of instancia cu tin producto of obra relaciona cu e gran fiesta cultural di nos pueblo aki, cerca e consumido cu ta busca esaki pa cumpra den un ambiente agradabel.
Expresa bo creatividad y amor pa cultura di Aruba dor di participa y engrandece e fiesta cultural aki. Sea decorando vitrina di negoshi of dorna cas, te cu bisti flanel of paña den e colonan tradicional, participa activamente pa haci e fiesta aki algo grandi. Ban uni den celebra nos mes, expresando nos identidad, Aruba henter ta progresa.
Esnan cu ta desea mas informacion of esnan cu kier anuncia un evento of participa activamente na e celebracion aki por tuma contacto cu Instituto di Cultura Aruba na tel. 583-1618 of subi e pagina web: www.institutodicultura-aruba.com

-- FIN --