Programa di Fiesta di San Juan ta cla
Yamada pa tur hende prepara pa Dera Gai

Dia 24 di juni ta dia di San Juan of manera conoci den boca di pueblo dia di “Dera Gai”. Instituto di Cultura Aruba (ICA) ta cla cu e programa di celebracionnan di e aña aki y awor ta haci un yamada na tur culturista, centro di bario, grupo di baile, artesano, amante di cultura Arubiano y tur hende interesa, pa prepara pa haci e fiesta tradicional di nos comunidad algo grandi atrobe e aña aki. Yama registra bo actividad na tempo pa keda inclui den e calender nacional di celebracion di Dera Gai.
Diasabra dia 19 di juni proximo, lo tin e di dos grandioso Show Nacional Cultura y Parada den caya grandi. Manera tur hende por corda cla cla ainda, e celebracion di aña pasa a marca pauta, imponiendo un norma nobo pa festivalnan cultural na unda un publico enorme a mira un sinfin di banda y participantenan celebra nos herencia cultural di un manera alegre, sano y sumamente bunita. E reto ta e aña aki pa engrandese e celebracion ainda mas y surpasa tur expectativa atrobe. Por spera un desfile di gruponan, tanto folklorico como di baile, pa exhibi trahenan tipico y mucho mas sopresa agradabel. Sin laga afo e tremendo Rab’i Gai, cual tabata e last lap cu a forma espontaneamente aña pasa. E aña aki ta encurasha henter Aruba bini cu nan flanel di dera gai y forma e rabo di gai mas grandi di e festival.

Diahuebs 24 di juni, dia di San Juan mes, lo tin un cantidad di celebracion den barionan rond Aruba. Ta pidi centronan di bario, organisacionnan, artistanan cu obranan special pa e festival di dera gai, empresanan etc. pa yama ICA y raporta nan contribucion, actividad of otro forma cu kier participa, pa asina esaki keda documenta y presenta den e programa di nacional ICA pa 2004. Decora vitrina cu adorno na colornan tradicional, esta gel, cora y preto, of uza simbolonan di e fiesta cultural manera, gai, candela, lenso, etc. Tuma ehempel di hobennan di scol kendenan a demostra cu un cantidad di obra cu e tradicion aki ta uno creciente na Aruba. Na gruponan di baile y gruponan folklorico of asta individuonan cu ainda no a inscribi, pero kier ta parti di e celebracionnan aki por yama ainda y ricibi detayes con pa participa.
Expresa bo creatividad y amor pa cultura di Aruba dor di participa y engrandece e fiesta cultural aki. Sea decorando vitrina di negoshi of dorna na cas, te cu bisti flanel of paña di e colornan tradicional, participa activamente na haci e fiesta aki algo grandi. Ban uni den celebra nos mes, expresando nos identidad Aruba henter ta progresa.

Esnan cu ta desea mas informacion, of esnan cu kier anuncia un evento of participa activamente na e celebracion aki por tuma contacto di inmediato cu Instituto di Cultura Aruba na www.institutodicultura-aruba.com of na tel. 583-1618

-- FIN --