Buki y CD nobo pa fiesta di San Juan entrega na Minister di Cultura
Minister Lee cu elogio pa contribucion di Juby Naar y Robert Maduro

Dialuna 14 di juni ultimo a tuma lugar na despacho di Minister di Cultura, entrega di dos adicion nobo y sumamente balioso pa promociona fiesta di San Juan of Dera Gai. Tabata sr. Frank Croes, compaña pa sra. Glenda Reiziger, ambos di Instituto di Cultura Aruba (ICA) kendenan tabata tin e grato placer di presenta señores Juby Naar y Robert Maduro pa esakinan haci entrega di nan contribucion grandi na cultura di Aruba.

“Desde e charla recien teni na ICA unda pa prome biaha tur e informacion impresionante aki a keda presenta, mi a concuri cu Minister Lee, cu nos mester publica e informacion aki pa publico!” asina Director di ICA, sr. Frank Croes, a laga sa na momento cu el a expresa su aprecio pa e contribucion di sr. Juby Naar na momento cu el a entrega sr. Naar e prome ehemplar cu a keda imprimi.

E buki cual ta disponibel desde ayera na ICA, a cuminsa keda reparti na tur e scolnan di Aruba den un esfuerso pa sigui concientisa comunidad di e balor di nos herencia cultural. A keda palabra cu tur aña ICA lo sigui amplia y reparti e buki informativo aki pa asina, segun deseo di sr. Naar y Minister Lee, comparti e conocemento y crea mas entusiasmo pa nos festivalnan cultural.
Como si fuera poco, sr. Robert Maduro, conocido cantante di musica tipico, empleado di ICA, tambe a haci uso di e bishita pa asina estrena su CD nobo nobo cu ta specialmente pa Dera Gai.

Ademas di e cantica tradicional, sr. Maduro pa trata di stimula creatividad di nos artistanan, a produci varios cancion tipico cu e tema di Dera Gai. Robert Maduro y Su Alma Folklorico, un biaha mas ta marca pauta ofreciendo nos pueblo mas di su musica tipico alegre, bailabel y contagioso. Cu sosten di comunidad e CD aki ta sigur di bira un hit grandi, animando henter comunidad durante fiestanan rond di nos isla dia di San Juan.
Durante e bishita a intercambia tambe riba con pa haci uso di nos festivalnan cultural miho pa stimula amor patrio y atrae bishitante di afo, ideanan pa mehora festivalnan y otro actividadnan cultural, como tambe con pa haci mihor uso di nos baluartenan den comunidad. Tanto ICA como Minister Lee a keda cu compromiso pa sigui mehora e actividadnan cultural, envolviendo nos baluartenan mas y e ideanan cu nos hendenan mes ta trece dilanti. Ta innegabel sinembargo cu durante e ultimo 2 añanan cu e festival di San Juan como tambe cultura en general di Aruba, a crece cu paso enorme y cu tin un entusiasmo grandi pa tur loke ta trata cultura di Aruba.
Esnan cu ta desea mas informacion por tuma contacto cu Instituto di Cultura Aruba na www.institutodicultura-aruba.com of na tel. 582-2185.

-- FIN --