Reuniendo tur bendedo di producto cu himno, bandera of simbolo nacional den un solo lugar y ambiente festivo
Feria patriotico cu tur articulo pa celebracion nacional

Dia 18 di mart ta Dia Nacional di Himno y Bandera. Tur aña Aruba ta celebra na grandi e dia aki cu un variedad di actividad. Durante e ultimo añanan nos bandera a resalta tur caminda durante di e dianan prome y durante e celebracion nacional aki. E aña aki lo kier mira mas inovacion y crecemento den, tanto producto patriotico como actividad celebrativo den tur distrito. Pa esaki, ya caba Comision Celebracion Dianan Nacional (CCDN) a cuminsa reuni y ta preparando un programa pa motiva un participacion masal den henter comunidad.
Minister di Cultura, sr. Ramon Lee, ta spera di haci e celebracion e aña aki ainda mas significativo y pesei di awor caba ta pidi tur hende pa prepara nan bandera, nan flanel y demas articulo relaciona cu nos simbolonan nacional. Es mas Minister di Cultura ta reta creatividad di nos hendenan, incluyendo artista y comerciante, pa trece producto patriotico nobo riba mercado na un prijs rasonabel pa asina tur hende expresa nan patriotismo.
Pa promove esaki lo organisa e prome Feria Patriotico riba e fin di siman di 12, 13 y 14 di mart, unda na Entertainment Center lo bai tin tur, pero tur, producto relaciona cu nos simbolonan nacional y e celebracion di nos Himno y Bandera obtenibel. Ademas di producto decorativo tambe lo tin varios stand di cuminda crioyo, musica folclorico y un ambiente di feria excepcional cu wega, rifa y entretenimento pa henter famia. E fin di siman di diabierna 12 te cu diadomingo 14 di maart, cuminsando 11’or di mainta te 11’or di anochi, un y tur cu tin producto cu ta califica segun criteria menciona lo tin un stand pa ofrece nan producto of servicio na publico. Lo ta e oportunidad unda tur hende por pasa busca nan parafanalia pa e celebracion y na mes momente gosa di un ambiente ameno y festivo.
Ta pidi tur persona of instancia cu ta interesa pa haya un stand pa bende su producto pa tuma contacto cu sr. Robby Rossel na telefon 588-0900 of via fax 588-0331 pa reserva un lugar. Di awor caba, henter comunidad di Aruba ta keda invita pa asisti na e feria aki, unda por busca tur nan articulonan pa celebra himno y bandera.
Durante e siguiente dianan lo publica mas informacion pa cu e celebracion di Himno y Bandera 2004.

-- FIN --