Muchanan ta encanta cu proyecto di Dera Gai na Scolnan

Faltando apenas algun dia pa celebra e grandioso Dia di San Juan, scolnan rond Aruba ta yen di entusiasmo pa loke ta nos fiesta di San Juan. Instituto di Cultura hunto cu Fundacion Dera Gai ta pasando varios scol unda pa medio di presentacionnan ta stimulando mas ainda e espirito festivo di nos herencia cultural
E bishita ta consisti di splicacion, demostracion di baile, cantamento di e cantica, participacion di studiante y maestronan y tambe e grito di gai. Tur esaki ta pasa den un ambiente anima pa e propio studiantenan. Durante e bishitanan aki tambe, ICA ta haci entrega na e scolnan di e buki di e conocido sr. Jubi Naar.

Minister di Cultura, sr. Ramon Lee diabierna ultimo a pasa experiencia pa su mes e ambiente na e scolnan. Na Club Caiquetio, Scol Basico Pastor Kraanwinkel tabata sumamente bon disciplina y alabes anima. Den un ambiente festivo un y tur a pasa un rato ameno y a siña mas di nos cultura.
Despues na Colegio Ora Ubao, hunto cu Scol Preparatorio Aurora, atrobe a experiencia tur e goso di nos muchanan participando completamente den nos tradicionnan.
Diasabra den Caya Grandi tin e tremendo celebracion di ICA, Fundacion Dera Gai y Mambo cual ta cuminsa den oranan di mainta caba cu varios grupo musical, benta na prijsnan crioyo, artesania y cushina crioyo y ta termina cu e parada di San Juan cu lo termina na Entertainment Center.

Un y tur ta cordialmente invita pa asisti na e diferente actividadnan di diasabra den Caya Grandi y contribui na nos cultura. Pa mas informacion tuma contacto cu Instituto di Cultura Aruba na tel:582-2185.

-- FIN --