Comunidad invita pa participa
Celebracion di festival di Dera Gai den tur skina na Aruba

Dia di San Juan of manera conoci den boca di pueblo dia di “Dera Gai” ta tuma lugar diahuebs 24 di juni proximo. Ya por mira tur caminda cu e fiebre di e festival cultural aki a pega y ta plamando den tur skina. Diahuebs awor, Dia di San Juan, rond Aruba tin celebracionnan den bario, delaster un distrito tin actividad. Centro di Bario Brazil, Pro Juventud Savannah Liber na Noord, Comision Rooi Frances, S.V. Jong San Nicolas, St. Anna School, Bubali Sport Club, Centro di Bario Noord, Sportboys na angochi, Centro di Bario Ayo, Centro di Bario Tanki Leendert, tur tin actividadnan planea. Mayoria di e actividadnan ta cuminsa despues di 5’or di atardi, cu excepcion di St. Anna School cual ta di 8’or di mainta pa 12’or di merdia. Centro di Bario Playa Pabou ta tene un tremendo celebracion diabierna dia 25 di juni na nan Centro di Bario aya na Bushiri y diasabra y diadomingo 26, na Centro Sabana Grandi lo tin un torneo deportivo Dera Gai di 10 or di anochi pa 10 or di anochi.
Expresa bo amor pa cultura di Aruba dor di participa y engrandece e fiesta cultural aki activamente. Sea decorando vitrina di negoshi of dorna na cas, te cu bisti flanel of bisti paña di e colornan tradicional di dera gai, participa activamente na haci e fiesta aki algo grandi. Ban uni den celebra nos mes, expresando nos identidad Aruba henter ta progresa.
Esnan cu ta desea mas informacion, of esnan cu kier anuncia un evento of participa activamente na e celebracion aki por tuma contacto di inmediato cu Instituto di Cultura Aruba na tel. 582-2185.

-- FIN --