Inscripcion pa programa di vakantie 2004 di Museo Arqueologico y exposicion di programanan di vakantie anterior diadomingo awor

Mescos cu añanan anterior, Museo Arqueologico Aruba ta ofrece e programa di vakantie pa muchanan den vakantie grandi. Conhunto cu 4 studiante di Instituto Pedagogico Aruba (IPA) a traha riba un programa cu actividadnan varia, pa asina nos hubentud por siña na un manera recreativo y educativo un tiki di nos antepasadonan. E aña aki e tema lo bay ta “Ora-Oubao, isla di cocolishi”. E contenido ta keda un sorpresa.

Diadomingo ultimo di luna, 27 di Juni, manera ya ta costumber, museo lo ta habri di 11’or di mainta pa 2’or di atardi. Riba e dia aki lo tin un exposicion di programanan di vakantie anterior. Mayornan por pasa pa haya un idea kico e programa di vakantie di museo ta encera y alavez inscribi nan yiu(nan) pa e programa 2004. Pa esnan cu no por pasa na museo, por tuma contacto cu museo na tel. 5828979 of 5889961.

Por inscribi pa un di e siguiente fechanan: Juli dia 13; 15; 20; 22; 27; 29 of Augustus dia 3 y 5. Lo tin un programa riba diamars mainta pa muchanan di edad 6 pa 9 aña y riba diahuebs mainta pa muchanan di edad di 10 pa 13 aña. Esaki lo ta entre 9’or di mainta pa 12’or di atardi.

E tema di e programa di vakantie ta forma parti di un programa publico cu Museo Arqueologico tin en conexion cu e di diez publicacion di museo , “The Archeology of Aruba, The Marine Shell Heritage”, cual museo lo presenta na publico e aña aki. Museo lo informa publico tocante esaki mas despues.

Museo Arqueologico Aruba ta invita tur interesado pa pasa diadomingo awor, entre 11’or di mainta te cu 2’or di atardi na Instituto di Cultura Aruba, J.E. Irausquinplein 2 A, (patras di misa San Fransisco).

-- FIN --