MUSEO NUMISMATICO ARUBA  ta duna bon bini na weganan Olympico 2004.

Weganan Olympico atrobe ta den porta y ta apropia pa nos tira bista ariba su origen antiguo (Ancient). Esaki tabata un festival di origen Griego remarkable cu a influencia nos cultura di awendia y tambe monedanan di e tempo ey.

E fecha original di e promer wega Olympico ta data for di 776 BC (promer cu Cristo).

Nan tabata celebra e actividad di victorioso aki cada cuatro aña na e lunanan di Juli of Augustus. E Griegonan tabata usa e periodo mei mei di e weganan pa calcula con tempo ta pasa; e periodo a ser yama Olympiad.

E festival aki a sigui su curso te na aña 393 AD (despues di Cristo), ora cu e emperador christian Piux Theodosius a prohibi e weganan pasobra nan tabata ser asocia cu e tradion pagano bieu di e Griegonan.

Porfin e weganan a cuminsa bek na aña 1896 y apropiadamente nan a ser teni na Athenas, Grecia. Asina tambe e ciclo di cuatro aña a ser manteni cu excepcion di durante e gueranan mundial.

Originalmente deporte tabata solamente un parti di e weganan pasobra tambe tabata inclui competencia di literatura y composicion musical.

Promer cu tur cos e festival yama Olympiada cu tabata ser celebra pa e Griegonan tabata ritualnan religioso cu tabata honra e diosnan Olympico y esun mas importante tabata Zeus. E celebracion tabata cuminsa na e sanctuario di e Zeus na e stadium di Olympia. E Griegonan tabata respeta e lugar aki masha hopi mes. Ora cu e Griegonana (Spartano, Peleponnese, etc)  encontra cu otro den competencia Olympico nan at stop di Guerra un cu otro durante e celebracion.

Originalmente e evenementonan di atletismo ta cuminsa na e “stadium” y tabata un sprint di mas o menos 200 yarda. E palabra Griego “stadium” at nifica “largura”.

Gradualmente nan tabata agrega mas evento y e parti di atletismo / deporte a bira poco poco e competencia mas importante.

Pa 500 BC e competencianan tabata dura 5 dia y tabata inclui; coremento, bulamento halto, tiramento di disco, tiramento di lansa y lucha libre. Tambe tabata tin competencia di coremento di cabay y di cabay cu ta lastra un caroserie cu un persona aden. Tur esaki tabata socode den cercania di e temple di Zeus na Olympia. E Ganado di cada evento ta ricibi un man yen di olivo procedente di e mata sagrado cu tabata crece banda di e temple di Zeus.

Aunque den nos wowonan moderno e Olympiada antiguo ta mustra hopi modesto nan tabata di gran importancia religioso y politico pa e Griegonan.

E Griegonan  hasta a traha diferente monedanan cu lo conmemora e weganan antiguo pa semper.

Boso por aprecia ariba e fotonan e caroserie ganador di e Olympiada di 488 BC

Tambe por aprecia un jinete cu e cabay di e Rey cu a gana e competencia di Olympiada 356 BC,

Como tambe e dos luchadonan ariba e moneda di Olympiada 400 BC

Awendia paisnan ta competi cu otro nan Olympiada y tin un nificacion di Union y Paz na mundo entre tur nacion. Tambe diferente paisnan traha moneda pa conmemora e evento grandi aki y awendia tur coleccionista ta busca pa cumpra e monedanan di Olympiada.

Museo Numismatico Aruba tin diferente moneda di diferente paisanan cu ta conmemora Olympiada cu un moneda. Aruba mes tambe a conmemora Olympida na aña 1985 y tur hende ta bon bini pa wak esaki. E aña aki ta un Olympiada hopi special mes pasobra e ta bolbe ser teni na cas : Grecia.

Suerte na tur competidor.

Articulo scirbi pa Desiree Croes, Director Museo Numismatico Aruba

-- FIN --