Aruba a participa na programa di intercambio di herencia comun riba invitacion di “Nederlandse Museumvereniging”
Relacionnan Internacional di Asociacion Hulandes di Museo a organisa na juni di e aña aki un programa di intercambio relaciona cu herencia comun. Pa esaki a invita un delegacion consistiendo di profesionalnan riba e tereno aki di Antiya, Aruba y Surinam. E meta tabata pa stimula intercambio di conocemento internacional riba tereno di herecia comun (monumento, museo, arkeologia y herencia inmaterial) di Antiya Hulandes, Aruba, Surinam y Hulanda.
Pa Aruba, sra. mr. Arminda Franken-Ruiz di Museo Arqueologico Aruba, a forma parti di e delegacion y a hiba conversacion principalmente cu representante di museo y instancia cu ta activo den arkeologia y cultura inmaterial. A bishita mas cu 10 instancia na Hulanda cu a ser selecta pa e “Nederlandse Museum Vereniging” y pa delegado mes. Banda di interes y pregunta cu Museo Arqueologico mes tabata tin, a aserca tambe di antemano Museo Historico Arubano, Buro di Monumento y Archivo Nacional di Aruba pa informa tocante nan pregunta na instancia Hulandes.
Hopi informacion a ser intercambia entre delegado y instancia. Durante cierto bishita a sera acuerdo di principio, cu ta regarda varios area di interes pa e partidonan. Entre otro a palabra, cu e institucion cu ta cuida y maneha sitio arkeologico na Hulanda, esta “Rijksdienst voor het Oudheidkundig Bodemonderzoek”, lo asisti Museo Arqueologico Aruba den e proyecto di re-inventarisacion di sitio arkeologico na Aruba, dor di duna training na e colaboradonan di Departamento cientifico. Huntu cu Museo Arqueologico y Antropologico di Antiyas lo entrega un proyecto pa estudio di e colecionnan di Aruba y Antiya den “Rijksmuseum voor Volkenkunde” y “Tropenmuseum”. “Nederlandse Museum Vereniging” (seccion relacionnan internacional) lo ta dispuesto pa fungi como coordinado di stagiaires di Hulanda pa Museo di Aruba. Tambe a ricibi hopi informacion skirbi, cu ta disponibel pa publico na Museo Arqueologico Aruba.
Di e bishita aki por conclui cu Aruba lo por beneficia hopi di un relacion mas estrecho entre instancian cultural local y esunnan Hulandes. E experiencia, expertisio y e “herencia comun” ta haci instancia Hulandes partner ideal. Di otro banda Aruba su conocemento tocante coleccion di region (Aruba, Antiya) ta di hopi importancia pa e institucion caminda e coleccionnan aki ta warda. Ta bin acerca cu na Aruba tin material cu no a studia ainda cu ta parti di e “herencia comun” di e paisnan menciona.-- FIN --