Enrikese bo conocemento :

Forma di paga Primitivo: Placa Primitivo

Aruba su Boton tambe por ser cualifica como placa primitivo.

Ta dificil pa imagina mundo sin placa. Pero kico exactamente ta placa? Placa por ta diferente cos, pa mayoria hende e ta moneda, biyete, carchi di plastic y hasta un buki di papel representando e cantidad di placa na banco.

Pero pa algun hende di antes placa tabata pluma, piedra, kraaltji, cocolishi, etc pasobra e obhetonan aki tabata ser considera balioso pa diferente motibo.Tur esakinan nos por describi como Placa Primitivo.

Formanan primitivo di pago na Norte America y tercer mundo ta hopi reciente y mihor documenta cu na Europa. Estudio riba placa primitivo a trece luz y claridad riba e origen di placa moderno. Na Africa ainda ta usa forma di pago primitivo.

Topiconan hopi studia awendia ta e Wampum y Potlach di Norte America. Un piedra traha den forma di disco na e isla di Yap como tambe e cowrie cu ta cocolishi na Africa y Asia. Tambe hopi interesante ta e djente di tribon y e manillas cu ta ornamentonan traha di metal.

Manillas tabata obhetonan traha di metal y usa como joyas na West Africa tanto como sistema di pago (placa) te cu recientemente te na 1949. Nan tabata notabel y hopi gusta como decoracion y esei a haci su balor subi y haña aceptacion como forma di pago.

E aceptacion y uso di Wampum como forma di pago dor di e natibonan Norte Armericano sigur a bin, si tuma na cuenta e hecho cu nan ta hopi gusta como decoracion na curpa. Metal precioso semper tabata tin un lugar special den historia como decoracion pa curpa y esei lo ta un di e rasonnan pakico el a wordo adopta y adapta como forma di pago den diferente civilisacion y sociedad tanto antiguo como moderno.

Na e islanan Fiji, e sociedad a duna balor grandi na djente di tribon. E djente di tribon tabata y ta hunga un rol grandi den ceremonia religioso y esei ta motibo pakico el a haña asina hopi balor te hasta pa nan consider’e como forma di cambio y hasta por a wordo usa como pago di bruid. Asina tambe e piedra yama fei di isla di Yap tambe tabata tin prome un balor religioso y ceremonial prome cu el a bira un forma di pago. E piedra di Yap a wordo usa como forma di pago te na 1960 y ta hopi gusta pa colectionista rond mundo.

Baca tambe por ser describi como forma di pago den cierto civilisacion. E tabata tin un balor halto na Roma antiguo y tabata constitui forma di pago mayor. Pa motibo di e dificultad di transportacion Roma a traha su prome moneda den forma cuadra cu e simbolo di baca.

Di e baca a deriva e palabra Latino pa placa Pecuña.

Origen di Placa ta bai atras na e sistema di cambio usa den diferente civilisacion. Esaki a sosode te ora cu metal a cuminsa reemplaza e sistema di cambio aki. Esaki tin varios motibo.

Pero pa sigui papia riba placa primitivo nos mester recorda cu mundo a y ta conoce diferente civilisacion. Tur cu diferente cultura, idioma y custumber. Curioso ta cu placa primitivo no a origina precisamente pa guia nos economia pero tin otro motibonan y esakinan ta diferente den cada civilisacion. Por ehempel pa paga un famia ora cu casa cu nan yiu muher como tambe pa paga un famia ora cu sacrifica of asesina un familiar.

Na Sur America, Norte America y Africa placa primitivo ta hopi bon documenta pasobra na ta hopi recien. Mundo nobo y Africa a keda pa mas tempo fiel na civilisacion bieu y tabata haci poco cambio den sociedad te cu binimento di e Europeano. Den Europa, Medio Oriente y China placa primitivo ta data for di hopi mas remoto y ta na Medio Oriente cu oro ta haci su introduccion.

Museo Numismatico Aruba a habri un vitrina dedica na placa primitivo di henter mundo cu nan storia y nos kier invita bo pasa y siña conoce nan mas di cerca. Bin admira placa traha di ivor, palo, textil, cabei di rabo di olifante, djente di tribon, kraalchi, cocolishi y hopi mas.

No lubida cu nos propio indigeno di e tribu Caquetio a usa un articulo semehante na un boton, cual nan tabata usa como decoracion, manera cadena y armband, pa nan haci cambio un cu otro, of sea un placa primitivo di Aruba.

 Articulo skirbi pa Desiree Croes y Ruben Odor

-- FIN --