E ARUBIANO y SU TERA

Relato na ocasion di Encuentro Cultural

25 di november 2004

Instituto di Cultura Aruba

Seccion di Musica

Contexto historico

Entre añanan 1816 y 1833 poblacion di Aruba tawata consisti di 2746 habitante.

Na aña 1862 e poblacion Arubano tawata di 3258 habitante, di cua 2802 tawata personanan liber i 456 esclavo. Tawatin 1561 hende homber y 1697 hende muhe.

Na 1863 te cu 1870 tawatin 3881 habitante. Entre 1871 te cu 1880 e poblacion tawata di 5900 habitante y entre 1871 te cu 1890 e poblacion tawata di 7743 habitante.

Den e tempo aki e medio di tranportacion riba tera tawata burico of cabai, riba lama tawata boto di diferente tamaño. E actividadnan principal tawata plantamento, piscamento y cuidamento di bestia. No tawatin coriente, tabata saca awa di pos, tabata lesa ora di e solo, strea y di e luna. Di loke planta ta come, di loke pisca ta come, di e bestianan cu cuida ta come. Pa salud, ta usa e matanan pa remedi. Ta planta e tera y di e lodo ta traha cas. Nos Arubianonan tawata depende di e naturalesa rond di nan. E comunidad di e tempo ei tawata uno sera.

Trahamento di tambu

Tambu ta wordo coba di e troncon di palisia. Ta rek e cuero di cabrito riba dj’e. Ta mata e chubato, soya su cuero cu hopi cariño pa no piek’e despues ta curti e cuero, cu ta nifica cu ta kita e lana for di e cuero cu awa di kalki y finalmente ta rek e cuero riba e tambu. E rekmento ta sosode cu bahamento di solo, pa e cuero seca poco poco henter anochi. No ta rek e cuero riba e tambu mainta, pasobra e solo lo seca e cuero di biaha, cu consecuencia cu e tono di e tambu ta keda mucho halto. Cu e baranan di cordon di San Fransisco ta seya e cuero rond di e tambu. Tin tambuleronan, cu ta duna nan tambu un nomber. Dominico Maduro a yama su tambu “Vencedor”. Goi Ras no a duna su tambunan nomber.

Tur e material cu ta traha e tambu ta sali directamente for di e naturalesa.

Tocadonan di tambu

Na aña 1854, Mariana Krozendijk a duna lus na Juan Grigorio Krozendijk (Goi Krozendijk). Goi tawata un mulato. E poblacion no tawata conta cu mas di 3000 habitante. Goi, ta e prome tocado di tambu cu nos sa di dj’e. E tawata toca tambu y canta dande. Na aña 1880, Maria Nofina Krozendijk ta duna lus na Simon Krozendijk (Buchi Mon Krozendijk). E poblacion di Aruba tawata di 6204. Buchi Mon tawata tocado di tambu i cantado di dande. Buchi Mon tawata biba na Ser’i Ton (Sero Biento). Un otro tocado i cantado di tambu tawata Wimpie Maduro. Na aña 1868 Agosta Krozendijk, ruman di Buchi Mon, ta nace. E ta casa despues pa misa cu Matew Maduro, naci na Rancho abou y batisa cu pisca. Matew Maduro ta tocado di tambu. E pareha ta bai cuida bestia pa mister Gordon, na saliña unda cu ta Colony awor. Cu binida di Lago, nan mester a bandona e lugar y a haya permiso pa rosa un pida tereno unda cu nan kier. Nan a rosa e tereno na Cura Cabai, unda cu awor ta Brasil.

Nan a traha nan cas y a planta e kunuku. Nan a haya nan yiunan cu tambe a keda biba ei banda. Ainda e desendientenan ta biba den Parokia di Brazil. Agosta (Shi Mai, madushi Mai y Matew (Buchi Matew of padushi Tew) tawatin 9 yiu. Casi tur nan yiunan a biba rond di nan mama y tata. P’esei nan a tene e tambu bibo den Brazil. E famia a concentra tambe na Sero Biento, Hooiberg y Playa pabou. Paulina Krozendijk, yiu di e pareha a casa cu Gregorio Ras, cu a nace na 1906. Buchi Goy Ras a gusta e tambu asina hopi cu e a siña tok’e. Den tempo cu Goy Ras a nace, Aruba tawatin 9700 hende. Buchi Goi ta cantado di dande y tocado di tambu.Dominico Maduro (Mo Ko) tawata traha, canta y toca tambu. Otro tocado di tambu di e tempo ei tabata Mo Lee Krozendijk. Mo Lee a traha un guitarra tre, tawatin su mes un conhunto y tawata maestro di e otro sobrinonan. Den e tempo menciona caba, no tawatin scol. E poco hende cu por a skirbi y lesa ta hendenan cu pasto a siña nan, pa nan por a resa na misa y pa defunto. Pa motibo di esaki, e hendenan cu sa, ta bin hunto y hunto nan ta compone un cantica. Nan ta keda ripit’e te ora nan por tok’e y cant’e. P’esei e canticanan di e temponan ei ta canticanan di compositor desconoci. Tambe por ta, cu despues di tempo, por traha un otro couplet p’e cantica, of ta sigui usa e wijs y ta cambia e palabranan. Den e lista di canticanan di tambu di compositor desconoci tin entre otro:

“Caminda di tera ariba” cu tin ritmo di siya,

“ San Barbola”, (siya),

“Reini”, (punda habri-sera),

“Ser’i ton ta riba bou” (cantica di biento),

“Cosecha” (cantica di biento)

“Albertina”, (punda habri-sera),

“ Mama ta co’i yora” (punda sera),

“Recuerdo di mi tata” (punda)

E repertorio di dande cu ta:

“Dande”, (punda sera)

“ Dia prome di janito” (cantica di biento”),

“Colo di cane na bela” (punda),

“ Bona noche, (Bon anochi), (siya),

“ Lagrima di fin di aña”, (punda lento).

Vicente Ras ta yiu di Goi Ras, e ta compositor, cantado y tocado di tambu. Dominico Maduro su yiunan, Luis Maduro ta traha, canta y toca tambu, Seferino Maduro ta toca tambu y Cado Maduro ta canta, toca y compone cantica di tambu.

E tocado y cantado di tambu di mas jong ta Bertrando Thiel. Den total tin cuatro generacion di tambu. Tur e grandinan ta di origen Africano. Consecuentemente, e tambu ta di origen Africano.

Contenido di e canticanan di tambu

E tambu ta e instrument principal den e grupo. Tin un di dos tambu pa yena un cantica. E ta wordo acompaña pa un of dos wiri, y tin un grupo cu ta ‘rati’ (bati) man, cu tambe ta forma e coro.

E ritmonan di tambu ta: punda tradicional cu ta sera y lento, punda habri-sera, cu por ta lento y lihe, siya y cantica di biento.

E punda habri-sera ta wordo usa pa adapta e ritmo di tambu di Corsou. Si toca cantica di Corsou, no ta toca nan cu e ritmo di Corsou, sino ta cambia e ritmo, pa un punda habri-sera. Asina tambu di Aruba ta diferencia su ritmo di otro ritmo di tambu.

E canticanan ta inspira pa: suceso di bida manera, yiu ta perde mama, yiu ta bai afo pa traha, bida amoroso, saludamento di cuminsamento di aña, ta expresa deseo pa un bon aña, ta gradici, e Rubiano ta demostra su bon manera. Tambu tambe ta wordo usa pa canta otro. Ora cu ta canta otro sa bin problema.

Ta toca tambu pa aña nobo y ta paga bela dia 6 di januari, pa celebra cosecha, y pa otro festividad. Por toca y balia tambu henter aña.

E Papiamento usa den e tempo ei ta un Papiamento cu palabranan cu actualmente casi no ta wordo usa mas. Palabranan manera mi “combles” cu ta un rival, nos no ta tende mas di dj’e. Dichonan manera “Manga fini manga grof”, bo a busca manga pa mula mi. “Si ta mula bo kier mula, mula mi cu reberencia.” “E señorita di ter’i Ruba nan tin mal manera di bisti rouw na curason pa nan lubida bo.” “Tin hende ta skirbi nan bunita cu papel cu pen cu ink. Ami a skirbi mi bunita riba mi blachi di curason.” Ta canta ora mester bai un otro tera, “Albertina a lanta bela” ta nomber di un boto di bela. “Briek Con Con” tambe. Ta canta e hende muhe manera: blenchi sambo, mi prenda, mi bunita. E cantica “Colo di cane na bela” ta referi na un mucha muhe cu ta bai cu un boto di bela. Den e prome coupletnan e refrein ta “Tira wowo mir’e”, despues e ta bira “Ay yuda mi yor’e”.

E tambu describi ariba no ta ritual. Tambu ritual ta wordo hopi biaha toca pa manda hende den trans. Esaki ta e caso di montamento. P’esei ta hopi importante pa mayornan cu tin yiu cu ta toca cuero, pone tino si nan yiunan tin cierto don. Si esaki ta e caso lo por guia nan na tempo.

E tambu di awendia

E tambu no ta wordo traha mas di palisia. Ta usa un bari di clabo y ta adapta e hoepelnan. E parti di ariba si ta keda cuero di cabrito. No ta curti e cuero cu awa di kalki mas, sino ta feita e cuero. Ta sey’e rond di e tambu cu cordon di San Fransisco. Ta yama e tambu: tambu of bari.

E tocadonan di tambu, e tambuleronan ta wordo mas exponi na diferente otro ritmonan. Vicente Ras tawata cantante di conhunto “ Superior “ y tawata toca maraca. Tambe el a canta cu orkesta “Happy Hit”. E mes a funda quinteto “Los bigotes”. E a canta canticanan di Cuba y a bin den contacto cu ritmo manera jazz. Bertrando Thiel tawata integrante, cantante, di “Twins”, a toca tambu pa “Grupo Katachi” y awor ta toca tambu pa “Alma Folklorico”. Luis Maduro y Cado Maduro a toca den diferente otro grupo. Actualmente, Luis Maduro ta rek e cuero riba e tambu. E tambu di awendia ta sigui mantene e ritmo original.

E compositornan ta sigui compone nan canticanan segun e situacion actual. Tur aña ta bai cu paranda di aña nobo pa saluda nos hendenan. E ora, ta pasa cu Dande di tambu, cu ta un repertorio di cuatro pa cinco cantica.

E tambuleronan ta personanan cu hopi talento den arte en general. Ademas di ta musikantenan, nan por pinta, traha storia, improvisa, conta chasco y tur esaki ta haci cu e contenido di nan canticanan por ta pret, tristo, patriotico, etc, sentimentonan cu tur hende por identifica nan mes cu ne. Nos bieunan y nos tocadonan di tambu actual, tin hopi respet pa hende. P’esei nan canticanan no mester tin dobel sentido pa entretene. Nan talentonan artistico natural ta suficiente pa nan duna un bon presentacion.

Padushi Tew a yega di bisa: ”Matew Maduro no tin tempo. Tur tempo ta su tempo, unda cu e yega su reis ta keda”.

Mi ta caba mi relato bisando: ”Tambu di Aruba no tin tempo. Tur tempo ta su tempo, unda cu e yega, su reis ta keda.”

Celia O. Thiel, sociologa

November 2004

-- FIN --