Fundacion Pro Crea conhuntamente cu Access Art Gallery ta presenta rondleiding di e exposicion “Papillote” guia pa e artista Frenk Graat.

Access Art conhuntamente cu Fundacion Pro Crea ta presenta rondleiding di e exposicion “Papillote” guia pa e artista local Frenk Graat.

Ta trata aki di un artista autodidactico y hopi talentoso cu dia pa dia ta sorprende nos mas cu su creacionnan artistico.

E labor artistico di Frenk Graat ta mustra un madures cu ta resultado di practica y experimentacion espontaneo cu ta resulta den obranan sorprendente y sumamente yamativo.

E artista tin un estilo hopi personal y por ser categorisa como uno hopi intenso y te na cierto punto erotico. Su adoracion pa e ser femenino ta hib’e den un inspeccion profundo unda cu e ta mustra e figura di un manera mahestuoso y monumental.

Ta como si fuera ta un acto di amor sublime den e proceso creativo unda e resultado ta obranan cu ta vibra cu energia y colo.

Obranan cu ta expresa un proceso di buskeda pa haya e parti femenino di humanidad.

Den su ultimo pinturanan e formanan aki ta haya hala y ta bira mas etereo, tur esaki atrabes di e ser femenino, e mama, e amante, e diosa, e serpiente y e angel.

Frenk Graat ta usa un tecnica cu por ser cataloga como medio bruha y unda e ta pone nos corda riba e “street art culture” di añanan ochenta unda dibuhonan ingenuo y imagen di grafiti a ser incorpora den “main stream art ” por ehempel den obranan di Kenny Scharf, Jean Michel Basquiat y Keith Haring.

Tambe nos por aprecia e elemento di creacion espontaneo manera den pintura di accion bibo di Ives Klein cu tabata pinta usando imprenta di e curpa humano.

Pa Access Art Gallery y Fundacion Pro Crea ta un gusto pa presenta un artista cu ta demostra cu Aruba ta un tera fertil pa inspiracion artistico dunando asina Frenk Graat e oportunidad pa demostra su talento y crecemento artistico cu su exposicion “Papillote”.

Publico en general ta keda bonbini na Access Art Gallery situa den Caya Grandi diahuebs 25 di november 2004 pa ricibi e rondleiding di “Papillote”. E exposicion ta keda habri te cu 14 di december 2004.

-- FIN --