Ken ta artista Grace Ashruf Rahusen?
Pirmi riba imagen
GRACE ASHRUF RAHUSEN ta un artista cu a nace na Surinam. Grace su educacion formal den arte a cuminsa na Nola Hatterman Institute na Surinam. El a sigui desaroya su habilidad di arte durante un estadia di dos aña na Guatemala, caminda el a studia arte na Tuscany Art School y na The Monet Art School. Grace tambe a participa na un curso intensivo na Universidad Rafael Landivar, na unda el a haya e oportunidad pa studia cu artista renombra di Guatemala. Na Corsou tambe el a atende Academia di Arte y Classic Caribbean Art School pa dos aña y mei. Durante su estadia di tres aña na Corsou el a tuma curso di ceramica na Jane’s Ceramic Art School. Grace a atende dos curso intensivo cerca e artista renombra George Ramjiawansingh, durante su bishita di regreso na su pais natal, Surinam. Grace ta bibando ya pa cuater aña na Aruba y e ta anticipando caba continuacion di desaroya di su estilo y talento cu influencia di e bunitesa y hende di e isla.
Asina leu di su famia
y su pais, Grace a cuminsa dedica tur su talento na pintamento. Su tata
a traha su prome cabai profesional mas of menos 10 aña pasa y el
a dedica e exposicion di Banco RBTT na dje, ya cu su tata a fayece demasiado
lihe.
“Lo mi a desea di comparti e sentimento y emocion aki cu ne,”
Grace a bisa.
Su exposicionnan te
awo:
2003 Exposicion RBTT Bank, Aruba
1999 Exposicion di Grupo ”Classic Caribbean Art Gallery, Corsou
1999 Exposicion di Grupo (ceramica) na Biblioteca Publico Willemstad,
Corsou
1998 Exposicion di Grupo na restaurant y galeria di arte “De Taveerne”,
Corsou
1996 Exposicion di Grupo scol di arte “Toscane”, Guatemala
Mi ta pinta exclusivamente for di sketch, sea captura for di naturalesa morto of di un localidad. E uso di ferf di azeta of acrilico ta permiti mi pa pone mi sentimento y emocion usando hala di kwashi poderoso y tambe haciendo uso di colo fuerte.
Mi ta pinta te ora mi captura kico mi kier y mi ta haci empeño pa no copia un suheto, pero interpret’e. Den algun pintura mi ta usa un acercamento mas realistico, mientras cu den otro pintura mi ta usa un acercamento abstracto basa riba mi sentimento di algun momento den tempo. Constantemente mi ta cambia, crece y haya direccion nobo, asina cu hasta pintura cu mi a pinta pa mas cu un dozijn di bes caba ta haya un buelta diferente cada biaha. E diferente estilo ta mantene mi trabou y mi bida interesante. Mi coleccion ta encera lus, forma, colo y emocion. E Surinam y Guatemala colorido y multicultural y e briyante y resplandente claridad di dia di Aruba, tabatin un influencia grandi riba mi estilo di pinta. E forsa conductivo tras di mi pinturanan ta mi deseo pa captura e intensidad emocional y espacioso relacion di mi suheto, p’asina e observado sinti y mira kico ami a sinti y mira.
-- FIN --