Prome ehemplar di Novela “Tera di Silencio” di Quito Nicolaas entrega na Minister di Cultura

Diabierna ultimo tabata di bishita na despacho di Minister di Cultura, e conocido autor Arubiano sr. Quito Nicolaas. Esaki relaciona cu publicacion recien di e di 5 buki di sr. Nicolaas, un novela titula “Tera di Silencio. Ademas di ta un autor di varios obra literario sr. Nicolaas tambe ta fungi como Presidente di e Fundacion Simia Literario, cual ta promove literatura tanto na Aruba como na Hulanda.
Sr. Nicolaas a intercambia tema, cu e Mandatario di Cultura, sr. Ramon Lee, encuanto desaroyo positivo cu a bin ta tumando lugar den mundo literario na Aruba, particularmente cu adelanto prometedor pa loke ta trata Papiamento. Sr. Nicolaas a comenta na e Mandatario cu e novela aki ta un contribucion mas na Papiamento como nos idioma. Nos (comunidad di Aruba) ta birando mas conciente cu nos idioma natal ta asina rico, cu awendia por skirbi un novela di mas di 310 pagina manera esaki”, segun sr Nicolaas ta referi na su buki recien publica.
Sin duda algun e contribucion di sr. Quito Nicolaas ta uno di aprecia y pa cual Minister Ramon Lee tabata tin palabra di felicitacion y elogio pa su tremendo talento y esfuerso. Minister Lee, den cuadro di su plan di maneho pa cultura ta sigui promociona Papiamento y literatura y ta pesei ta urgi un y tur pa busca e buki nobo di Quito Nicolaas pa nan coleccion na cas.
E buki aki ta obtenibel na Instituto di Cultura Aruba na un balor di Afl 45,-- .

-- FIN --