Feria di producto cu simbolo nacional den un solo lugar y ambiente festivo cu mas di 30 tent
Ken lo tin e producto patriotico mas inovativo e aña aki?

   

18 di maart, Dia Nacional di Himno y Bandera ta un djis. Tur aña Aruba ta celebra na grandi e dia aki cu un variedad di actividad. Durante e ultimo añanan nos bandera a resalta tur caminda durante di e dianan prome y durante e celebracion nacional aki. E aña aki ta desea di mira mas inovacion y crecemento den, tanto producto patriotico como actividad pa celebra den tur distrito. Pa esaki, ya caba Comision Celebracion Dianan Nacional (CCDN) a cuminsa reuni y ta preparando un programa pa motiva un participacion masal den henter comunidad.
Minister di Cultura, sr. Ramon Lee, ta spera di haci e celebracion di e aña aki mas significativo y pesei di awor caba ta pidi tur hende pa prepara nan bandera, nan flanel y demas articulo relaciona cu nos simbolonan nacional. Es mas Minister di Cultura ta reta creatividad di nos hendenan, incluyendo artista y comerciante, pa trece producto patriotico nobo riba mercado na un prijs rasonabel pa asina tur hende expresa nan patriotismo.

 

Pa promove esaki lo organisa e prome Feria Patriotico den fin di siman di 12, 13 y 14 di mart, unda na Entertainment Center lo bai tin tur, pero tur, producto relaciona cu nos simbolonan nacional y e celebracion di nos Himno y Bandera obtenibel. Ademas di producto decorativo tambe lo tin varios stand di cuminda crioyo, musica folclorico y un ambiente di feria excepcional cu wega, rifa y entretenimento pa henter famia. E fin di siman di diabierna 12 te cu diadomingo 14 di maart, cuminsando 11’or di mainta te 11’or di anochi, un y tur cu tin producto cu ta califica segun e criteria menciona lo tin un stand pa ofrece su producto of servicio na publico. Lo ta e oportunidad unda tur hende por pasa busca nan parafanalia pa e celebracion y na mes momente gosa di un ambiente ameno y festivo.
Ya tin 30 tent registra pa e evento aki, cu un sin fin di producto creativo, inovativo y yen di amor patrio. Di awor caba, henter comunidad di Aruba ta keda invita pa asisti na e feria aki, unda por busca tur nan articulonan pa celebra himno y bandera. Durante e siguiente dianan lo publica mas informacion tocante e celebracion di Himno y Bandera 2004 of acudi na www.institutodicultura-aruba.com pa mas informacion.

-- FIN --