Secretario di Estado Hulandes gosando di nos naturalesa, cultura y deporte

Diadomingo, dia 29 di februari, Parke Nacional Arikok tabata yen di actividad un biaha mas, brindando tur bishitante oportunidad di gosa y siña un poco mas di nos naturalesa y cultura. Entre e bishitantenan di diadomingo tabata resalta bishita di Secretario di Estado Hulandes pa Asunto di Salubridad, Bienestar y Deporte, esta sra. Clémence Ross-van Dorp, kende tabata invitado special di Minister di Labor, Cultura y Deporte, sr. Ramon Lee. Durante e recurido diadomingo mainta e Mandatarionan a pasa un rato ameno den man di Parke Nacional Arikok su wardaparkenan, team di maneho y representante di Hulanda na Aruba.
E secretario di Estado Hulandes, kende ta na Aruba den cuadro di un bishita relampago pa e.o. firma un convenio di cooperacion entre Aruba y Hulanda riba tereno deportivo. E ta amante di naturalesa y fanatico di caminata den naturalesa pa cual motibo e recurido den nos Parke Nacional tabata un parti importante di e bishita pa ambos mandatario. Durante e recorido a bishita Cunucu Arikok, Dos Playa y e cueba di Fontein y el a ricibi splicacion di sr. drs. Egbert Boerstra. E conocido arkeologo a splica na miembro di e team di maneho di parke y e wardaparkenan presente varios aspecto di naturalesa y cultura di Aruba.
Minister Lee a compaña su colega di deporte durante e bishita y a haya oportunidad di intercambia di idea riba varios topico den un ambiente relaha y ameno. Minister Lee a cuminsa dialoga cu su colega di Hulanda desde e exitoso weganan di Reino 2003 cu a tuma lugar na augustus aña pasa na Aruba, ta kere cu e convenio di cooperacion cu lo keda firma lo habri caminda pa un cooperacion mucho mas estrecho entre Aruba y Hulanda riba tur ramo di deporte.
Haciendo uso di e bishita pa mustra e mandatario Hulandes mas di nos naturalesa y cultura, Minister Lee ta spera pa den futuro yega na un acuerdo di cooperacion cu Hulanda cu lo inclui e.o. nos Parke Nacional Arikok y tambe mas intercambio riba otro tereno cultural. Ambos tereno ta gosando di desaroyo positivo visibel durante e ultimo añanan. Parke Nacional Arikok, awor tin un structura organisatorio y un fundacion di maneho cu ta funciona segun regal y tur rond Aruba tin galeria, museo y instancia cu ta mas activo cu nunca promocionando actividad cultural. Minister Lee su compromiso pa cu esaki ta pa logra mas fondo financiero pa sigui sostene e desaroyo aki. :

Diadomingo ultimo den Parke Nacional Arikok, Secretario di Estado Hulandes, sra. Clémence Ross-van Dorp, (robes) invitado di sr. Ramon Lee (drechi) a haya un recorido bou guia di sr. Roy Croes, lider di team di maneho di Parke Nacional Arikok.

Na cunucu Arikok sr. Egbert Boerstra a duna splicacion na e bishitantenan y e delegacion Hulandes.

Den e ambiente di nos naturalesa y herencia cultural e secretario di estado di Hulanda sra. Ross-van Dorp, hunto cu representante di Hulanda na Aruba, a haya splicacion di wardaparkenan di Parke Nacional Arikok.

-- FIN --